uMthunywa
Uguqukile umhlaba, iguqukile imibono yethu ngempilo, aguqukile amasiko, ziguqukile izinto esizenzayo, itshintshile imizwa yethu njengamankazana, atshintshile amalungelo, itshintshile impilo esiyiphilayo, lapho siqomana, lapho siqonyiwe lalapho sitshadiwe. Umbuzo ke osesemqoka bandla yikuthi njengoba konke sekuguqukile, ngabe ulokhe elemvumo yokungibeka isandla engakangitshadi uAdam, njengenhla-layenza, kumbe ngemva kokungitshada?
Lokho, sizathi sigxile kakhulu ekubekweni isandla ngumuntu ongakangingenisi emambuleni, ngumuntu ongaziwa kwethu, ngumuntu ongakayinaba kwethu ahlale ecansini avulelwe amasango abengumkhenywana owaziwayo.
Ijaha elibeka intombi yalo isandla lingakaveli kumane kubangelwe yikusweleka kwenhlonipho, ukusweleka kothando, lobuqotho, lokuzimisela.
Nxa into ithe yahanjiswa ngendlela akubi lezinto ezinjalo ezenzakalayo. Ijaha vele kalilayo imvumo yokukubeka isandla, phela wena awusi mntanalo, ikanti ngalesisikhathi liyabe lingabangane nje engakaziwa kwenu. Lanoma esekuthethe waba ngumkakhe akalawo amalungelo awokukubeka isandla njengoba uyabe ungumlingani wakhe amnikezwe nguJehova ukuthi ubengumsizi wakhe . Akumelanga owesifazane avume ukuqilibezelwa abe etshaywa ngokungabafana okungaziwayo ngakini.
Abanye bahle bakubeke ngale indlela: akuqondile ukuthi umngane wakho akubeke isandla engakakutshadi ngitsho lanxa esekutshadile. Lokhu kumane kuhle kukwambulele ikusasa lenu ukuthi vele esekuthethe wakufaka endlini phinde akuhloniphe, uyabe ekutshaya santando ekwenza ibhola lakhe lamaphepha. Phela lokhu kutshengisa ukuthi uyabe engakuthandi eqinisweni kambe into oyithandayo ungafuna ukuyilimaza kumbe ukuyizwisa ubuhlungu, angithi uyiphatha njengeqanda.
Khona vele ekadeni abadala labo baze babumba isaga esithi induku kayiwakhi umuzi ngoba besazi mhlophe ukuba ukutshaya umkakho akufanelanga njalo ngeke kulunge lutho kulowomuzi. Nxa ekutshaya akakufanelanga, akasiwakho, uzamthola owakho.
Okumele ukwazi yikuthi evele yakhiqizwa ingumququmbo kunina, ukhona ongakwazi ukuyivuthisa? Njengoba lababantu bahlangana eqinile, esegcwele umlomo amazinyo, ungakhona uzakwazi ukumqondisa uEva, wena Adam?
