uMthunywa
UMGADLI weLamontville Golden Arrows, uKnox “Mjomana” Mutizwa, uthi bakubeke emahlombe abo njengabadlali beqembu ukwehluleka kwalo ngesizini ephelileyo.
UMutizwa uthe ngesizini ezayo, bazadlalela ukuthi bafike kunkezo yeMTN 8.
UMutizwa (26), ongomunye wabadlali abamqoka labayinsika ku-Arrows, uthe loba enelise ukutshayela iqembu lakhe amabhola amqoka kulisizini ephelileyo, kodwa akumthokozisi njengoba behlulekile ukufaka iqembu kumaqembu ayisitshiya galombili aphezulu kwe-log.
Lokhu besekuyisizini yesibili kulandelana ngaphansi kukamqeqetshi uSteve “Mphathi” Komphela.
Ngesizini ephelileyo Abafana Bes’thende baqede isizini behlezi endaweni yetshumi lambili ku-log yePremiership ngaphezudlwana komkhaya babo AmaZulu.
Kusukela leli qembu lingena kuPremiership ngesizini ka-2015/2016 lisuka kuNational First Division (NFD) – kulandela ukugawulwa kwalo lizembe ngesizini ka-2013/2014 – bese likwenze injwayelo ukuqeda isizini libalwa lamaqembu ayisitshiya galombili aphezulu kwe-log yePremiership.
Likwenzile lokho kulandelana ngesizini ka-2016/17 leka-2017/18 liqeda endaweni yesitshiyaga lombili ku-log yePremiership.
“Kungumsebenzi wami njengomgadli ukuhlohla amabhola, kodwa akekho umgadli loba umdlali waloba yiliphi iqembu okujabulelayo ukuhlohla iqembu lakhe lidonsa nzima ngoba phela wonke umdlali ufuna ukubona iqembu lakhe lisenza kuhle.
“Lami-ke ngiwahlohlile amabhola kulisizini ephelileyo, amanye lawo enze umehluko emidlalweni emqoka esiyidlalileyo,” kutsho uMutuziwa ngoLwesibili.
Umdlali lo uthe inhliziyo yakhe idabukile ngalokho.
“Ukuhlohla amabhola kuyinto ehlezi ingijabulisa ngaso sonke isikhathi njengomgadli, kodwa angijabulanga ngokupheleleyo njengoba iqembu lingenzanga kuhle ngesizini ephelileyo.
“Kunengi okusenqabele ukuthi sidlale kuhle okubalisa ukudlala phakathi kwe-bio bubble, okuyinto ebesingakaze sihlangane layo.”
Uthe kodwa labo njengabadlali beqembu kufanele bakubeke emahlombe abo ukungenzi kuhle kweqembu kulisizini edluleyo.
“Kuyinto evamileyo ukuthi iminwe ikhombe kuphela umqeqetshi nxa iqembu lingenzanga kuhle,” kutsho lumdlali.
Umgadli lo ogijima laseqenjini lesizwe amaWarriors uphakame phezulu ngezicoco zokuba yiPlayer of The Tournament emqhudelwaneni weCosafa Cup owanqotshwa ngamaWarriors ngo-2017 udlalelwa eNorth West.
UMutizwa obambane loKermit Erasmus, Bongi Ntuli loSamir Nurkovic ngamagoli angu-13 kulisizini ephelileyo, akakufihli ukujabula kwakhe ukubekwa ngomklomelo wokuba ngumtshayi wamabhola ohamba phambili kuPremiership ngelinye ilanga.
“Kuyisifiso sami esikhlulu ukuthi ngelinye ilanga ngiphiwe iLesley Manyathela Golden Boot Award, futhi kuyangikhuthaza ukuthi isizini ngesizini ngiya ngokuya ngithuthuka ekutshayeni amabhola,” kuphetha uMutizwa.
