uMthunywa
INHLANGANISO yeNational Aids Council (Nac) isinanzelele ukuthi inengi labantu lomele ulwazi ngePost-Exposure Prophylaxis (PEP). Kuqakathekile ukuthi wonke umuntu azwisise ukuthi kuyini.
IPost-exposure prophylaxis kumbe iPEP kutsho ukunatha imithi yama-antiretroviral (ARVs) khonokho nje usanda kuba sesimeni esikufake engozini yokuthi ungabe uthelelwe igcikwane leHIV, ukuze lokhu kungabangeli ukuthi ucine usulegcikwane le HIV. Imithi le uyithola kuphela nxa ubhalelwe ngudokotela. Ukuze isebenze, i-PEP kumele iqale phakathi kwamalanga amathathu ngemva kokuba sesimeni esikufake engozini yokuthelelwa iHIV, ngoba igcikwane liyabe lingakamemetheki kakhulu emzimbeni.
Zinengi indlela umuntu angathola ngazo iHIV. Phakathi kwazo kuzingozi kanye lokudlwengulwa, ukusebenzisa ijekiseni kumbe ekusebenziseni izidakamizwa. Abanye babakwazi ukuthi umuntu ahambe laye emacansini ulegcikwane leHIV. Omongikazi, odokotela kanye labo sosayensi abasebenza ema-laboratory abasebenza ngabantu abalegcikwane le HIV bahlangana legazi lokunye osekungaba legcikwane leli ngesikhathi besenza imisebenzi yabo. Lokhu ke kudinga iPEP.
IProphylaxis itsho ukuvikela umkhuhlane. Umuntu engakasebenzisi iPEP, uyahlolwa ukuthi ulegcikwane leHIV na. Ukuvikelwa emkhuhlaneni (prophylaxis) kwenziwe ngemithi yama- anti-retroviral njalo inathwa okwensuku ezingamatshumi amabili lasitshiya galombili (28). Udokotela kumele abone ukuthi yiwuphi umuthi olungele ukunathwa ngulowo muntu kusiya ngokuthi uhlangane njani legcikwane leli. IPEP iphephile loba nje kwabanye abantu ingabangela ukugula kancane. Ukugula lokhu okuseceleni kuyelapheka njalo ngeke kubulale umuntu.
Khumbula ukuthi iPEP kumele isetshenziswe kuphela nxa sokwenzakele isehlakalo esingajayelekanga esingabangela ukuthi umuntu abe legcikwane leHIV. I-PEP ayingeneli ezinye indlela zokuvikela igcikwane le HIV, ezinjengokusebenzisa amakhondomu ngendlela eqondileyo kumbe ukusebenzisa amajekiseni ahloliweyo.
Ngenxa yesiphatho esingasihle salabo abadlwengulwiweyo, inengi lalabo lesaba ukukhuluma ukuthi lidlwengulwiwe ngakho bacina bengasatholi ithuba lokunikwa iPEP. Abanye ngabesaba ukuhletshwa ukuthi banatha ama ARVs ngakho bacina bengasebenzisi iPEP. Kuqakathekile ukuhlolwa igcikwane le HIV ukwazi isimo sakho. I-Nac kanye lamalunga ayo iqhubekela phambili ikhuthaza abantu beZimbabwe ukuthi bakwazi ukuthi akulunganga ukubandlulula labo abanatha amaARVs lalabo abadlwenguliweyo.
Vakatshela esibhedlela esiseduze lawe kusesemasinya nxa ungazibona susengozini yokuba legcikwane le HIV uthole iPEP. Ukhumbule ukunatha imithi njengoba utshelwe ngudokotela. Kodwa, iPEP kumele isetshenziswe nxa kwenzakale isehlakalo obungasikhangelelanga esiyingozi. Ayimelanga ezinye indlela zokuvikela. Sebenzisa amakhondomu ngendlela eqondileyo njalo ube lesithandwa esisodwa esithembekileyo.
INac ikhuthaza wonke umuntu ukuthi ahlolwe igcikwane leHIV njalo labo abajayele ukuya emacansini kumele bahlale behlolwa ngazo zonke izikhathi.
