‘Ukuzala yikuzimbela’

17 Jun, 2021 - 00:06 0 Views
‘Ukuzala yikuzimbela’

uMthunywa

Nkosilathi Sibanda
UKUPHUMELELA komdlali wenguqu uMarvelous Nakamba kujabulisa uyise osecebisa abadlali abasakhulayo ukuthi balandele inyathelo lalumdlali we-Aston Villa.

U-Antony Nakamba uphose wehlisa inyembezi ebabaza izimanga ezenziwe yindodana yakhe ngesikhathi ekhuluma kumbuthano wokusungula inkezo yeMarvelous Nakamba Tournament ngeviki edluleyo.

“Angilamandla okuthi ngibike ngokugcweleyo ukuthokoza kwami ngesenzo sikaMarvelous,” kutsho uyise womdlali.

“Ukuze acabange ukuthi asungule inkezo le ngemali yakhe kuveza ukuthi ulesifiso sokuphathisa abadlali abasakhulayo kunguqu. Kubalulekile ukuthi abasakhulayo bafunde okunengi kuMarvelous ngoba laye waphiwa ithuba lokudlalela enkundleni eziphezulu esasemcninyane.”

Kumbuthano lo obekunxuswe osaziwayo kumdlalo kanobhutshuzwayo, kuvele ukuba uMarvelous kasoze aphelele ekuxhaseni umncintiswano wenkezo kodwa kuzakuba lohlelo lokufundisa abadlali ngezempilakahle lokuthatha umdlalo wenguqu njengebhizimusi.

Umgcinisihlalo weMarvelous Nakamba Foundation uBrian Moyo uthe bakubone kufanele ukuthi andubana kudlalwe, abadlali bazahlaliswa phansi bangeniswe ezifundweni.

“Inkezo le ayigxilanga enkundleni kuphela. Sifuna ukuthi abafana bafundiswe lokhu esikubiza ngokuthi ngama-Life Skills. Inguqu isiguqukile, ayisafani lakudala. Kuqakathekile ukuthi abadlali abasakhulayo balaywe, baphiwe amacebo okuphila emdlalweni,” kutsho uMoyo.

Loba umncintiswano lo ungasoze udlalwe kulimpelaviki njengokuhlelwa kwawo, uMarvelous ngoLwesibili uthumele umbiko wokuthi ukuvikela abadlali emkhuhlaneni we-Covid 19 kumqoka kuye.

Ngenxa yezinqumo ezintsha eziphawulwe nguHulumende, ezemidlalo zimisiwe kusenqatshelwa ukumemetheka kwegcikwane.

Kusenjalo, amaqembu azancintisa atshelwe ukuba akhululeke ngoba abaqoqi bomncintiswano balungise konke kwaphutsha.

Bekulokukhonona kumaqembu athile mayelana ngokuncitshwa ithuba lokuthi alolonge abadlali kusaselesikhathi.

Amaqembu abadlali abalisa iHighlanders, Dynamos, Njube Spurs leManicaland Juniors ezihlelwe kuqoqo lakuqala njalo ezadlala esenkundleni yeWhite City.

Kuqoqo lesibili kubuthaniswe iAjax Hotspurs, Chicken Inn, Hwange Dynamo leBulawayo City enkundleni yeLuveve.

Share This:

Sponsored Links