uMthunywa
YiNtatheli kaMthunywa
KULANDELA ukuzwa ukuthi inguqu isizavunyelwa ukudlalwa, amaqembu asacathula kulumdlalo asebike ukuthi akulindile ukubuyela enkundleni.
Inhlanganiso yeSports and Recreation Commission (SRC) ibike kuliviki ukuthi imidlalo isiphensukile. Inguqu ibalelwa kuleyo okumele iqalisa nxa isilungisise konke okuhambelana lezixwayiso zokwenqabela iCovid-19.
I-Unity Village FC yatshiyane lokudlala inguqu yobungane emahlangeni nanko phela laqeda amasizini amabili litshibilika kuligi yeBulawayo Amateur Football League (Bafa) njalo lenza kuhle.
Kwasokuqede iminyaka leliqembu lisadalala kumidlalo yobungane. Kumidlalo le abakhokheli balithimu babika ukuba bebengatholi lutho kukanti labadlali babo bebelahlekelwa lithalenta ngenxa yokudlalela kunkundla eziphansi.
Umanenja weUnity Village uMartin Chingono uthe iqembu lakhe selifuna ukuphenduka enkundleni ngoba kade bayicina inguqu.
“Siyabonga ukuzwa ngokuthi lenguqu ingabvunyelwa loba yisiphi isikhathi. Sesifuna ukudlala,” kutsho uChingono.
UChingono uthe loba besadlala kuzigaba eziphansi, sebenanzelela ukuthi abadlali babo balesiphiwo somdlalo kodwa ababonwa muntu.
“Sesitshiyane lokudlala inguqu yobungane. Sidlala kuligi yeBafa khathesi ngoba inhloso yethu ngeyokuphakama siyeku-Division One kuminyaka emibili elandelayo.
“Inkokheli labadlali bethu bayavumelana ukuthi ukutshintsha iligi kuzanceda ngoba ithimu isizabonakala ukuthi ilethalenta. Abadlali bazathola amathuba, lethimu iphakamise ibizo layo lokuthuthukisa abalandeli.”
Umaneja lo uthe okubafuqele kuligi yeBafa yikuphumelela kweqembu lekhansili iBulawayo City FC.
“Bakhona ababecabanga ukuthi asisoke sisuke kunguqu yobungane. Sesikwenzile lokho ngokungena kuBafa.
Okwenziwa yeBulawayo City lathi sizakwenza,” nguChingono lo.
