uMthunywa
YiNtatheli kaMthunywa
UHULUMENDE uthi njengendlela yokuvikela ukwenyuka komkhuhlane we-Covid-19 okwesithathu (3rd wave) elizweni leli, usebenzelana lezinye inhlanganiso ngenhloso yokubuthanisa imali kanye lokunye okudingakalayo ukuze kuthathwe amanyathelo aqinileyo okulwisa umkhuhlane lo.
Ekhuluma lentatheli ngoLwesibili ngemva akomhlangano weKhabhinethi esigodlweni seHarare, uMphathintambo obona ngokuhanjiswa kwemibiko, uSenetha Monica Mutsvangwa, uthe imfundiso mayelana lokuvikela ukusabalala kobhubhane lolu, iqiniswa njalo kundawo zonke ezibhekane lodubo lokumemetheka kwalumkhuhlane lo kakhulu.
“Njengendlela yokuvikela ukwenyuka kwezibalo zabantu ababamba iCovid-19 okwesithathu, uHulumende useqinisa uhlelo lokusebenzelana lenhlanganiso ezitshiyeneyo ngenhloso yokuthi kube labantu abenza umsebenzi kanye lemali yokusebenzisa ukuze kube lokuvikelela okuqinileyo emphakathini.
“Indlela ezintsha ezisetshenziswayo zigoqela ukusebenzalana kakhulu lomphakathi mayelana lokuvikela lumkhuhlane,” utsho njalo.
Uqhubekele phambili wathi, “Kulandela ukukhuphuka kwenani labantu abalalumkhuhlane ezikolo, inhlanganiso ezibona ngezokuhanjiswa kwemibiko emayelana leCovid-19 aqhubekela phambili eqinisa umbiko wokuba abantu baqaphele lumkhuhlane lapho omemetheka khona kakhulu.”
UHulumende usesebenzise imali engange $11 bhiliyoni ekulwiseni iCovid19 kusukela lapho okwaqala khona ukumemetheka ubhubhane lolu kunyanga kaMbimbitho nyakenye kusiyafika elalamuhla.
Phezu kwalokhu, ilizwe leZimbabwe lisanda kuphiwa imali engange US$75 miliyoni ezaphathis aukulwisa umkhuhlane lo ivela kuGlobal Fund njalo imali le izasetshenziswa okweminyaka emithathu elandelayo.
uSenetha Mutsvangwa uthe uhlelo lukaHulumende lokuthuthukisa izibhedlela lamakilinika soluhlala ukutshengisela izithelo.
“UHulumende uthanda ukulazisa ukuthi isibhedlela se-Kusileni medical Centre sesilakho konke okudingakalayo ngemva kokuthuthukiswa njalo sizavulwa ngokusemthethweni kusikhathi esifitshane esilandelayo. Isibhdlela seThorngrove sathuthukiswa njalo sesilemibheda yezigulane eyi 28 elakho konke okudingakalayo endaweni elapha abantu abaleCovid-19 (isolation centre) njalo samukela abalalumkhuhlane,” kuphetha uSenetha Mutsvangwa.
