uMthunywa
YiNtatheli kaMthunywa
UMPHATHINTAMBO obona ngobudlelwano lamanye amazwe kanye lezokuthengiselana lamanye amazwe uDokotela Sibusiso Moyo useveze ukuthi ilizwe leZimbabwe lingaphumelela okumangalisayo nxa kungakhitshwa izijeziso zomnotho ezingekho emthethweni ezivela emazweni asetshonalanga.
Ekhuluma kumabonakude weZBC kuviki ephelileyo, uDkt Moyo uthe izijeziso zomnotho kanye lokuqhamuka kobhubhane lweCovid-19 kufundise ilizwe ukuzimela kodwa ukususwa kwezijeziso zomnotho kuzakwenza liphumelele liye kuzinga eliphezulu.
Amazwe angamalunga eSadc nyakenye anquma ukuthi kubekwe eceleni umhlaka 25 Mfumfu, futhi abambana kubizo lokuthi kususwe izijeziso zomnotho ezingekho emthethweni eziqondiswe kulizwe leZimbabwe.
Lonyaka umkhosi lo uzaqhutshwa ngaphansi kwendikimba ethi: “Ukuqinisela, Ukubambana, Ingqibekela phambili esimweni sokujeziswa.”
UDkt Moyo uthe iSecond Republic yenze njalo imizamo emikhulu yokuhlanganisa lasekugqugquzeleni ukubambana phakathi kwamazwe angamalunga eSadc, izwekazi leAfrica ngitsho leUnited Nations lapho unobhala jikelele uAntónio Guterres laye enza ubizo lokususwa kwezijeziso zomnotho eziqondiswe elizweni leZimbabwe.
“Sizwile ngesikhathi sokufika kobhubhane lwe-coronavirus ubizo lokuthi kususwe izijeziso zomnotho emazweni abekelwa izijeziso lezi ase Africa. Lokhu kwenziwe ngabadlali abehlukeneyo kungakho ngicabanga ukuthi kube lengqubekela phambili enkulu kuleyo ndima futhi lonyaka, umkhosi we- 39th United Nations General Assembly, kube labakhokheli bamazwe ehlukeneyo abalokhu behlabela ingoma yokuthi kususwe izijeziso zomnotho,” kutsho uDkt Moyo.
“Sithi thina izijeziso lezi kazisuswe, kazisasebenzi njalo kazisahambelani lezizatho obekufanele zibekelwe zona.”
Uthe umbuso okhona lokhu ulandela izibopho zawo zokufeza uVision 2030.
Uthe uhlelo lweTransitional Stabilisation Programme olwaqala ngo-2018 kusiya ku-2020 luzalandelwa luhlelo oluthuthukisayo lukazwelonke nxa ilizwe liqhubekela phambili.
UDkt Moyo uthe esinye isizatho esimqoka esenza ilizwe labekelwa izijeziso zomnotho luhlelo lokwabiwa kutsha komhlabathi osekugqitshwa ngokwenza isivumelwano seGlobal Compesation Agreement phakathi kukaHulumende lababengabalimi.
“Lesi simo sinikeze uhlaka olusebenzayo oluzaqinisekisa ukuthi indaba yokwabiwa kutsha komhlabathi iyafika emaphethelweni. Lezi yizo zonke indaba zengqubekela phambili esezenziwe ngumbuso lo wesibili,” kutsho yena.
UDkt Moyo uthe aluba akula zijeziso zomnotho ngabe ilizwe leZimbabwe belizathuthukisa usizo lwezenhlalakanhle ebantwini ukuze ilizwe libe selilungele inhlekelele ezitshiyeneyo ezigoqela iCovid-19.
Loba kunjalo, uthe ilizwe loba livinjiwe, ilizwe libhekane ngokuzimisela lobhubhane lweCovid-19 ngokusebenzisa indlela ezitshiyeneyo zokuvimba ukumemetheka kwegcikwane leli.
“Aluba kazikho izijeziso zomnotho, lanxa sibhekane lenhlupho esilazo, ngabe senza okuhle okumangalisayo ngalesi isikhathi.
“Ngoba sithethe isinqumo sokusebenzela abantu bakithi ukuze sithuthuke njalo sisebenza nzima njengabantu kungakho singaya phambili loba kuyisikhathi esinzima,” kutsho uDkt Moyo.
