uMthunywa
Siphathokuhle Ngulube
Salibonani bafundi. Ngithemba liphilile njalo izifundo zenu zenkulumo ngomumo lizilandela kuhle ukuze liphumelele emihlolisweni yenu ekupheleni komnyaka.
Lamuhla sizakhangela indlela yokukhulumisana ngomakhalekhukhwini ejayeleke kakhulu kulezi izinsuku.
Phose wonke umuntu ulaye umakhalekhukhwini kulezi insuku ongelaye ubonakala angathi usemuva abantu basuke balibale nje ukuthi iminwe ayilingani sizuza ngokwahlukeneyo.
Osekunanzelelwe yikuthi abanye bethu kasibasebenzisi kuhle omakhalekhukhwini. Sibasebenzisa ngendlela ezingelabuntu okwenza abantu bacine sebebathuka angathi ngabantu.
Ezinye izindlela esibasebenzisa ngazo zikhomba obala ukuthi ubuntu abusekho emphakathini. Sesitshabalele isizwe sakithi.
Zikhona izehlakalo ezingazinhle esizibona sezibhoda zijikelwana emaqenjini athile zisuke khona kubomakhalekhukhwini bethu. Ake sihlaziye izehlakalo ezilandelayo:
1. Uhamba ngemota yakho encane ulandelana lebhasi. Nxa nje ibhasi isehlela ebholohweni elithile, Mamo! Nanso inkalakatha yeloli layo ithutsha ithelile.
Awu ngokucwayiza kwelihlo kube sekuligazi indawo yonke, abanye ngabagiqika behlaba umkhosi kanti ke abanye sebemane badlula emhlabeni. Wena nxa usehla nje emoteni yakho uhle ukhuphe umakhalekhukhwini wakho uthathe imifanekiso yalabo abajanqukayo lasebethule.
Imifanekiso le nguwe osuyijikela emaqenjini athile. Kambe kuqondile lokhu yini? Izihlobo zalababantu zizakuzwa njani ngesenzo sakho lesi? Bungaphi ubuntu lapha?
2. Usegangeni lakini khonale ekhaya lapho ozalwa khona. Nxa uthi thala, wethuke uphose uzitshiye. Uzibuze ukuthi amehlo akho abona khona kanye lokhu okubonayo.
Indoda ende ekhonale, ilengile esihlahleni. Kube sobala ukuthi kukhona okuyihlukuluzileyo yacina izithatha umphefumulo. Nguwe lowana uthatha imifanekiso ethile andubana uthathele ngejubane uyetshela abadala.
Usuka lapho usuthumela izihlobo labangane. Mamo! Lisiyatshona ilanga imifanekiso isigcwele yonke indawo.
3. Uthe udlula nje esifuleni sakini ekhaya wabona amantombazana akoSinjonjo egeza enqunu. Kube yibhayisikopo kuwe ufice ilihlo elilodwa uthatha umfanekiso wezintombi lezi ezinqunu.
Nguwe lowana uthumela imifanekiso le ezindaweni ezinengi. Lisiyatshona ilanga ibe isifike lemazweni akude. Kuqondile yini lokhu?
Esintwini ubunqunu buyazila nje. Kubi ukuthumela izithombe zabantu abanqunu bafundi. Zihloleni.
Esintwini njalo ukufa kuyahlonitshwa. Lihlazo ukuzibona ukhuluma kubi ngomufi kanye lokuthatha imifanekiso ethile ngosethule uzibone usuyibhodisa indawo yonke.
Ngokunjalo ke bafundi asizameni ukusebenzisa omakhalekhukhwini ngendlela eqondileyo ukuze umphakathi ungacini usufisa lokuthi ngabe akakho ngoba phela yena uluncedo olukhulu kuye wonke umuntu.
Zibuze uziphendule ngaso sonke isikhathi ukuthi kambe lokho okwenzayo ngesikhathi esithile kuqondile yini? Asihlanganeni ngeviki ezayo.
