uMthunywa
KULIVIKI indlela ziqonde kumbukiso wamabhizimusi weZimbabwe International Trade Fair koBulawayo.
Kubuthene amankampani lengatsha ezigxile kwezamabhizimusi kuleli labanye abavela kwamanye amazwe. Isisusa sombukiso lo yikwakha ubudlelwano phakathi kwamabhizimusi, kuhloswe ukuthuthukisa umkhonomi lokwabelana ulwazi.
Minyaka yonke ngoMabasa, kuyaziwa ukuthi idolobho lakoBulawayo liyabe linyakazela, kuyisiphithiphithi. Lasemigwaqweni kugcwele izimota ezingakaze zibonakale koNtuthu, okuveza ukuba zikhona izethekeli.
Idolobho lakoBulawayo laziwa ngokuthi kusenzikini yamankampani amakhulu, ngakho ukuhlangana kwamabhizimusi kungumzekeliso wokuthi idolobho leli lokhe liqakathekiswa loba sekwaba lamankampani adonsa nzima kwezemali, lamanye avalwa kudala ngenxa yomkhonomi.
Esingakho ngombukiso weTrade Fair yikuthi umphakathi kumele ukwazi ukuthi ubaluleke kanganani kumkhonomi welizwe. Ngesikhathi ilizwe leZimbabwe ligaxwe izijeziso zomnotho, kuyajabulisa ukuthola ukuthi iTrade Fair iyaqhutshwa njalo lamankampani lokhe ekhwabitha ukubukisa lokwenza ibhizimusi lapho.
Ukubalukela kwalumbukiso kuphinda kubonakale kuhlelo lukaHulumende lokubumba kakutsha ubudlelwano lamanye amazwe, ikakhulu la abeka izijeziso zomnotho.
Lonyaka, ngokutsho kukamgcinisihlalo wenkampani yeZITF uMnumzana Busisa Moyo, kulamankampani edlula ikhulu abukisa okwakuqala. Isisindo sokusebenza kukaHulumende ekwakheni ubudlelwano lamanye amazwe siqiniswe yikuza kwamankampani asemazweni abalisa iBotswana, Malawi, Mozambique, South Africa, Zambia, Angola, Kenya, Nigeria, Tanzania, Belarus, France, Germany, Iran, Italy; Japan, the Netherlands, Sweden, United Arab Emirates, United Kingdom, China leMelika.
uMnumzana Busisa Moyo
Amankampani akuleli kumele athathe lelithuba avuse ibhizimusi lamankampani la avela emazweni aphucuke ukwedlula elethu.
Ithuba leli liza kanye ngomnyaka ngakho akumelanga libanjwe lingasetshenziswa. ITrade Fair le iletha osomabhizimusi abatsha abangazovulela abantu amafemu kutholakale imisebenzi kuleli.
Angithi amafekithali akoBulawayo avalwa. Nxa bekhona osomabhizimusi kuzwa, bazawavula amankampani la. Ithemba lisasekhona. UHulumende uzama ngazo zonke indlela ukuthi anxuse osomabhizimusi, okuyilapho okumele amabhizimusi akuleli agijimele phezulu.
Kungumbono woMthunywa ukuthi ngemva kwalumbukiso, kuzasala kulomehluko omkhulu kundlela amabhizimusi aqhutshwa ngayo.
Kuyadingeka njalo ukuthi izakhamizi zakoBulawayo zamukele izethekeli ngezandla zombili ukuze izethekeli zizizwe zikhululekile.
Lokhu kuzenza ukuthi labo abafaka izijeziso zomnotho bazizwe besiba lenhloni.
Izethekeli lazo kuzamele zithole indawo ezibukekayo zokuhlala ukuze zingahambi zihlambaza ngelizwe lethu. Lokhu kuzenza labafisa ukuzovula amankampani babone ukuthi kuyasebenzeka eZimbabwe.
Ukuphakama kweTrade Fair, yikuphakama kwelizwe lokuvuselelwa kwamankampani lomkhonomi. Kungumlandu womuntu wonke ozibiza njengesizalwane sakuleli ukuthi akubone ngobuhle okwenziwa yiZITF.
Iphephandaba likazulu likhuthaza umphakathi wakoBulawayo ukuthi uziphathe mhla uvulelwa amagedi wombukiso ngoLwesihlanu.
Sincoma iZITF ngokuzimisela kwayo ekuthini iqhube umbukiso lo ngesikhathi umkhonomi welizwe ungekho muhle. Akulula ukuqhuba umkhosi omkhulu njengalo kungela sekelo. Sitshayela ihlombe lamankampani akuleli abukisayo, okwaziwayo ukuthi adonsa nzima.
Kayiqhubeke isenza kuhle inkampani yeZITF.
