uMthunywa
Wayne Ncube
ABALIMI abafuyileyo sebekhuthazwe ukuthi balandele indlela eqondileyo yokunakekela impilakahle yezifuyo zabo ukuze baqinisekise ukuvikeleka kumikhuhlane emhlambini yabo.
Ingcitshi kumpilakahle yezifuyo kunkampani ye-Agrovet uMnumzana Peter Nyoni uthe i-bio-security ibalulekile ezifuyweni ngoba kuyindlela yokuvikela lokwehlisa izifo ezithelelwanayo esibayeni.
Ekhuluma lentatheli kaMthunywa uMnu Nyoni uxwayise abalimi ngendlela zokuvikela inkomo emikhuhlaneni zingakaguli.
“Nxa ufuna izifuyo zivikeleke emikhuhlaneni uqinisekisa ukuthi inkomo zakho ngeke zitholakale zilegcikwane le-protozoa kanye lemikhaza leminye imikhuhlane etholakala enkomeni.
“Abalimi kabahlale bele-bio-security esebenzayo, lokhu kuyabancedisa ngendlela zokuvikela imikhuhlane njengoba kusaziwa ukuthi ukuvikela kungcono kulokwelapha,” kutsho uMnu Nyoni.
Ukuphepha kwenkomo kuqakathekile ngoba abalimi bangavikela imikhuhlane kwenza behlise indleko zabo okwenza bathole inzuzo ephezulu.
UMnu Nyoni uthe okunye abalimi okumele bakwenze ukuvikela izifuyo zabo yikwenza ama-footbath.
“Abalimi bengaqala ukufaka ama-footbath avikela ukuthi umkhuhlane osuka komunye umhlambi wenkomo uye komunye.
“Umlimi kumele abe lemithi efana le-virukill, kerol le-biopham. Le imithi yenzelwa ukubulala lokuhlanza izibaya emagcikwaneni.
“Ukufaka ucingo njalo oluzenza izifuyo zakomakhelwane zingeqeli endaweni yakho lakho kuyaphathisa ukuvikela ukumemetheka kwemikhuhlane,” kuphetha uMnu Nyoni.
