uMthunywa
YiNtatheli kaMthunywa
Izibungwana ezimunya igazi ezifana lentwala zingaphambanisa ezemali kubhizimusi yokufuya inkukhu.
Ukuzilawula kubalulekile. Izibungwana ezihlasela inkukhu zigoqela intwala, amakulugu, imikhaza kanye lempukane. Izibungu lezi zihlala emzimbeni wenkukhu, ziyaziphambanisa ukukhula, ukubekela kwazo njalo zingamemethekisa imikhuhlane.
Intwala
Inkukhu zandise ukugcwala intwala ezimunya igazi. Intwala lezi zenza inkukhu zingahlaliseki njalo zenza zingakhuli kuhle okwenza zicine zibekela amaqanda amalutshwana. Intwala lezi zilakho ukuphila impilo yazo yonke zisenkukhwini zisidla isikhumba kanye lensiba. Zandise ukuhlala emlenzeni, esifubeni kanye lasempikweni.
Amakulugu
Amakulugu amunya igazi lenkukhu njalo zicina zingasakhuli kuhle. Kulemihlobo emithathu yezibungwana lezi.
• Kule-red mite lo ngumhlobo omkhulu njalo uhlala emikenkeni yesilugu senkukhu ube ususidla inkukhu ebusuku.
•I-northern fowl mite lesi sona sincane, njalo sihlala emzimbeni wenkukhu impilo yaso yonke. Nxa zingaba zinengi kwenza insiba zingathi zibamnyama.
•I-burrowing mite laso sihlala enkukhwini, senza inkukhu ilunywe njalo ilahlekelwe zinsiba, kube lamakhasi enyaweni zenkukhu okungenza icine igogeka.
Imikhaza
Umkhaza umunya igazi lenkukhu okwesikhathi esifitshane njalo uhlala isikhathi eside emikenkeni yendlu. Nxa ingaba minengi enkukhwini, yenza inkukhu ilahlekelwe yisisindo njalo icine ingasabekeli. Ingenza inkukhu icine igogeka njalo icine isiba le-spirochaetosis, okuyisimo esenza icina isihuda.
