Bhekimpilo Tshalibe
INKAMPANI ye-Agriseeds isixwayise abalimi ukuthi balime amatamatisi ngoba alenzuzo emangalisayo nanko phela asetshenziswa ngabantu nsukuzonke ekuphekeni.
UMnumzana Mduduzi Dube ongu-Agronomist kunkampani ye-Agriseeds uthe abalimi bangalima amatamatisi bazitshayele imali yabo enhle.
Uthe amatamatisi alemihlobo emibili egoqela i-determinante kanye le indeterminante.
“Amatamatisi alemihlobo emibili egoqela i-derteminate kanye le- indeterminate. Umhlobo wokuqala ukhula ubemfitshane, uba lamaluba uthele lezithelo ngesikhathi esifitshane.
“Umhlobo we-indeterminate wona ukhula ubemude njalo awumi ukufaka izithelo,” kutsho uMnu Dube.
Uthe kukhona umlimi okumele akukhangele nxa ekhetha umhlobo wamatamatisi afuna ukuwalima.
“Kulezinto umlimi okumele azikhangele nxa ekhetha umhlobo azawuhlanyela ezigoqela ukuthi umhlobo lo kawuhlaselwa lula yimikhuhlane, lokuthi umhlobo wamatamatisi ukhula ubenganani.
“Okunye kumele wazi ukuthi umhlobo wamatamatisi wakhona uthandwa ngabantu yini, kunye lokuba uvuthwa ngemva kwesikhathi esinganani,” kutsho uMnu Dube.
Uthe amatamatisi alomhlobo womhlabathi avuma kuwo.
“Sikhuthaza abalimi ukuthi balime amatamatisi emhlabathini ongenisa amanzi lula phansi. Umhlabathi wakhona kumele ube lobumunyu obuphakathi kwe-6.0 kusiya ku 7.0,” kutsho uMnu Dube.
Uthe amatamatisi kawafuni kulinywa endaweni elelanga kakhulu.
“Sikhuthaza abalimi ukuthi belime amatamatisi endaweni elomumo womkhathi ongaba yi 20 degrees Celsius kusiya ku-27 degrees Celsius,” kutsho uMnu Dube.
Uphethe ngokuthi amatamatisi alemikhuhlane emilutshwane njalo ukhuthaza abalimi ukuthi bawafafaze.
“Amatamatisi avame ukuhlaselwa yimikhuhlane egoqela i-late blight, early blight kanye le-gray mold njalo sikhuthaza abalimi ukuthi bafafaze amatamatisi besebenzisa i-mancozeb kanye le-chlorothanolic,” kuphetha uMnu Dube.
