uMthunywa
I-BEETROOT yisilimo esihle esilungele umzimba womuntu njalo ingalinywa ngesikhathi sebusika kusukela ngoNhlolanja kusiya kuNtulikazi. Yenza kuhle enhlabathini ephakathi laphakathi engazange ifakwe umquba ukuze kuvikelwe ukukhula kwamajodo angamahle.
Isilimo laso silakho ukukhula kundawo ezitshiyeneyo njalo ezilomkhathi otshiyeneyo.
Ukuphatha isilimo lesi
Nxa uhlanyela isihlahlakazana sakho yenza igodi elilingana impande zaso.
Fuqa inhlabathi ivale impande ngeminwe yakho. Thelela izihlahlakazana zakho uqeda kuzihlanyela kodwa ungatheleli kakhulu.
Khipha ukhula ngaso sonke isiskhathi uphinde uqinisekise ukuthi izihlahlakazana zakho zihlala zithelelwe okuzwayo ikakhulu ngesikhathi sokoma ngoba lokhu kungenza isilimo sakho singakhuli kuhle.
Nanzelela isilimo sakho ngoba silakho ukukhanga inyoni.
Ungavikela izihlahlakazana zakho ngokufaka izigubhu zepulasitiki ezisikwe phezulu laphansi besezisetshenziswa ukumbokotha izihlahlakazana zakho. Isilimo lesi siyabe sesilungele ukuvunwa nxa impande zaso kumbe amajodo aso eselingana lebhola legalufu kumbe ele-tennis.
Lokhu kungaba kunsuku ezingu-55 kusiya ku-70 ngemva kokuhlanyela.
Khipha amahlamvu ngokutshila ngezandla zakho. Faka i-beetroot yakho phakathi kwamabhokisi endaweni engelalanga njengasegalajini lakho.
