Ukulima i-garlic kulenzuzo emangalisayo

Langelihle Moyo

ABALIMISI sebekhuthaze abalimi ukuba balime isilimo se-garlic ngoba silenzuzo njalo siyanceda kwezempilakahle.

UNkosazana Treggy Mpofu oyi-Horticulture Specialist kunhlanganiso ye-Agritex esabelweni se-Matabeleland North, ongumlimisi, ukhuthaze abalimi ukuba balime i-garlic ngoba ilemali njalo iyasiza kwezempilakahle emzimbeni.

Uveze ukuba i-garlic ilinywa ngabalimi abalutshwane eMatabeleland njalo abalimi bayakhuthazwa ukuba bahlanganyele babe ngamaqembu bayilime ibenengi bayithengise. 

Uphinde waveza ukuthi i-garlic ayihluphi ukulinywa kwayo.

“I-garlic nxa uyihlanyela uyathatha ama-cloves ayo uwahlephune ubusuhlanyela ke incezu zakhona. Nxa uhlanyela ungagqibeli konke kumele amahlumelo ayo asale ekhanya.

“Ngemva kokuhlanyela nxa ithelelwa kumele lisebenzise isigubhu esilingeneyo lisibhoboze izikhala ezincane ngaphansi lithelele ngaso ukwenzela ukuthi isilimo lesi siphangise ukubamba njalo sihlume. 

“Ngemva kwamalanga amathathu kusiya kwamane i-garlic iyaphuma, amahlamvu ayabe esethutshile phezu komhlabathi. Isilimo lesi nxa sisaphuma sifuna amanzi amanengi, kuthi singafikisa amaviki amathathu umlimi uyabe esethelela kabili ngeviki,” kuchasisa uNkszn Mpofu

Uqhubekele phambili eveza ukuba isilimo lesi sithatha isikhathi ukuze sivunwe sithengiswe.

“Isilimo lesi sithatha inyanga ezine kusiya kunyanga eziyithupha ukuze sivuthwe silungele ukuba sithengiswe. Kuhekitha eyodwa umlimi ulakho ukuthola imali engaba yi-S$6 000 nxa usuyithengisile. Ikanti ihekitha eyodwa iyakwana ukuhlanyela incezu ezifika 300 kusiya 500 izigaqa ze-garlic usebenzisa i-10cm spacing,” kuphetha uNkszn Mpofu.