Uncategorized

Ukukotiza sekufundelwa

16 Jun, 2022 - 00:06 0 Views
Ukukotiza sekufundelwa Omakoti bevela enkunini

uMthunywa

NGOKWESIKO intombazane ibikhuliswa ngendlela yokuthi ifunde imisebenzi yekhaya ukuze ingabi lenkinga nxa isiganile loba isikhulile.

Kubukeka sengathi lokho akusenzeki kuwo wonke amakhaya njengoba abanye omakoti bakhule behlala emadolobheni kodwa nxa sebesenda bendele emakhaya.

UNkosikazi Londiwe Lolo Shezi okhulele edolobheni, uthi ukusebenza labomakoti abafika kuye bezoqatsha imvunulo kumenze wabona ukuthi kulabomakoti abangazi ukuthi ezinye izinto ezingumgogodla wesiNtu zenziwa njani.

Uthe ukupheka, ukugiga, ukucutha inkukhu uyilungise bese uyipheka, ukutheza, abanye abakwazi okuyizinto ezindaweni zasemakhaya ezisenziwa. Uthe lokhu kumenze ukuthi aqale uhlelo lokwabelana ulwazi esaziwa ngeMakoti Bootcamp ngo-2020.

“Ngabuka ukuthi lami ezinye zalezi zinto angizazi, kakhulukazi ukupheka utshwala ngoba umama bekungeyona into ayenzayo laye ekhaya.

Omakoti besikha amanzi

Ngazibuza ukuthi bangaki abanye omakoti kumbe abantu besifazane abangakwaziyo. Ngase ngizitshela ukuthi ngizakwenza uhlelo lapho okuzafika khona abantu abangeke bakwahlulele ngokungakwazi kwakho ukwenza lezi zinto kodwa labo abazakube belangazelele ukufunda ukuze kugcineke izinto ezingumgogodla wesintu. Nxa singakwazi ukupheka utshwala izingane zethu zona zizafundiswa ngubani?” kutsho yena.

Uthe ngo-2020 wasolwa kakhulu kuthiwa ucindezela abantu besifazane, ubabuyisela emuva.

“Lolu hlelo kimi soluyibhizimusi. Ibhizimusi  lilabantu abalidingayo. Akusiwo wonke umuntu olidingayo.

Angikulahlanga okwakutshiwo yizitshotshovu zabesifazane ukuthi kumele sithuthukisane, kungabi nje yinto yokuthi kuthezwe, kuphekwe. Yingakho lonyaka ngifake ukwelulekwa ngezifo ezithinta ingqondo, ezintweni esabelana ulwazi ngazo lesigaba sokuzijabulisa ngokuhamba ezintabeni,” kutsho uNkszn Shezi.

UNkosikazi Nqobile uMaZwane Khumalo (32), weKukhanyeni, eVerulam, uthe yena kumsizile ukuba yingxenye yabomakoti abahlangane kuloluhlelo.

Omakoti enkunini

“Mina ngikhule emakhaya kodwa angikwazi ukupheka utshwala ngoba ekhaya bekuhlala kulamathwasa abesenza yonke imisebenzi. Ngibone sengendile ukuthi kukhona okusilelayo  kimi.

Njengoba bengihlangane labanye omakoti angizange ngizizwe sengathi angiphelelanga  ngoba kulokuthile engingakwaziyo, besesekana, sifundisana langezindlela ezilula zokwenza izinto njengoba sitshadile loba singatshadile ngoba abanye balemizi yabo kodwa abatshadanga,” kutsho uNkkz Khumalo.

Uthe uninazala uyazi ukuthi ubehlanganyele labanye omakoti futhi ukujabulele ukuya kwakhe ehlelweni lolu.

UNkszn Queen Sibiya weMbo oyingoduso, uthe kuyamangaza ukuthi into encane efana lokubasa umlilo banengi abantu abangakwazi ukuyenza.

“Izinto zilendlela ezenziwa ngayo. Yilokho ebesiyokufunda. Emakhaya kuhlale kulabantu abazenzayo izinto ezithile.

Laphaya sithole ithuba lokufunda kuhle. Banengi abebesigxeka ezinkundleni zokuxhumana, bethi asikho isidingo sokufunda lezi zinto ebesiyozifunda ngoba ungakwazi ukuzithenga. Thina asifuni ukuthi nxa kusenzakala kuba lesimo esidinga ukuthi uzenzele bese ulokhu ubamba uyekela,” kutsho uNkszn Sibiya.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds