Ophezulu Stinta
Siqala isahluko sesikhombisa lapha esihlangana khona lamadoda ezihlalele emavinkilini aseMapate ezidlela amabele libalele. Besalibele kwathutsha imota yebutho lapho okwehla khona amadoda esabisayo kwathi enye le eyisiqwaga yahle yaqonda kuSikhonzimali umlisa wesigaba seMapate.
Kuyisimanga ukuhlangana legama elikhomba ukukhonza imali kwalindoda, kwenza sikhangelele ukuthi kunengi okungagcwaliswa libizo leli elichaza ukuthi ngempela yindoda ethanda imali okwamagama.
Ibizo lomuntu lona-ke liyatsho okunengi, liyamchaza umlingiswa ngobunguye bakhe. Nanso lesiqhwaga somlungu sihle siqonde kuye ngqo, sibuze ukuthi izinto zonke ziqhubeka njani esigabeni lapha. Akukho okwakudingwa ngamadoda ebutho ngaphandle kwamalwa ecatsha abafana ababezama ukuletha inkululeko yesizwe sabamnyama lawo kwakungamabonwa abulawe ayezingelwa ubusuku lemini.
Kwakusaziwa ukubana kwakuke kwaqhuma uthuli olunzima okwamagama phakathi kwebutho kanye lamalwa ecatsha la esigabeni saseSelonga. Umlungu wayeziqhenya ngokuthi babewathanyele aphela duu amalwa ecatsha la egangeni, lapha lokhu wayekugcizelela nje ukuze kungene kuhlale lakwabalaleleyo ukuthi nje bathi bazifica sebethatheka labafana beganga ngokufanayo labo babezadliwa luhlamvu lombhobho.
AbeLungu-ke babedume ngombuso wokwehlukanisa. Baqonqosela umphathi wesigaba uSikhonzimali ukuthi lapho ethe wabona amalwa ecatsha vele nje angaphozisi amaseko abazise ngokuphazima kwelihlo. Imbadalo yokuthengisa abafo kwakuyikuthola imali yotshwala. Kambe imali yotshwala ivele iyini pho ephephuka kungasali lempande nje lapho ebihleli khona.
Okumangalisayo ayekhona amadoda ayekhetha ukunatha utshwala ngegazi labanye abantwana okuyinto enzima kakhulu ukuyizwisisa kanye lokuyiletha ekuphileni kwalamuhla. Iyaphakama indoda enguSikhonzimali iqine ngesithembiso ngelithi yona vele yindoda eyaziwayo kuHulumende kakhulu, ngamafitshane isebenzelana loHulumende ngakho akulasizatho sokuthi yehluleke ukuma loHulumende ekuzingeleni amadoda la ahlala egangeni.
Lelolanga uSikhonzimali kazange ahlale etshwaleni isikhathi eside, masinyane nje wahle wabuyela emzini wakhe njengoba umzimba wakhe wayevele nje engawuzwa kuhle. Kambe kungabe kwakukhona okwakumbiza ngekhaya lapha.
