uMthunywa
Ophezulu Stinta
Umdlalo :Indlalifa ngubani olwalotshwa ngu N S Sigogo
Siqhubeka ngaphansi kwesihlokwana esithi sona “kasali ukukhuluma”. UPhehlani kanye loLuphondo baphakathi kwenkulumo enkulu egudla bona bobabili. Bazimisele konke okusemandleni abo ukuthi bagcine njalo balondoloze ilifa labo abalitholayo.
UPhehlani uxhoxhoza umfowabo ngelithi kambe bazimisele ukubuya babhade inyawo zabo koyisemncane lapho abaxotshwa khona njengezinja. Kakho ofisa ukuphindela khona.Lokhu kusivezela ukuthi ababili laba abalayo inhliziyo exolelayo, ngabantu nje ababamba isikhwili babophe ifindo.
ULuphondo ufikelwa njalo ngomunye umcabango othi wona kambe nxa umbiko ofikayo ungakhomba ukuthi babizwa nguyise omncane lo abangalwi laye, ongababangisi lutho babezakwala na.
UPhehlani-ke sengathi umqondo wakhe usulokunanzelela okuthile, uphendula ngelithi bona kabangali ukubizwa kodwa-ke abasoze bangene kumbe banyathele egumeni lapho abaxotshwa khona njengezinja ezingelancedo.Kuleli-ke babona ngaso linye njalo.
Besephakathi kokubonisana, kuthutsha uLomkhono ehaluzela, labo baze bamangale ngelithi pho kasoze ababhule ngobhulo na.
Masinyane nje ngokuphazima kwelihlo bavumelana ngelithi kungcono bahle babophe iso linye. Elabo-ke laba ngelithi bona njengabantu kabali ukubizwa yinkundla ngoba kabalasizatho njalo esokwala ukukhuluma, kodwa-ke abangazimiselanga khona yikulugxoba kuleliyana guma!
ULomkhono uthutsha ehaluzela esesekude ahle nje abakhombe ngobhulo lwakhe, ekhwaza ngelithi bangabantwana abanjani, mkhuba bani abafuna ukuwugila lapha ekhaya. UPhehlani ngelomuntu obobothekayo uphendula uyisekazi ukuba abuye azothetha ehlezi phansi, ngezinye indlela umkhulula ukuthi azophumula kuqala engakaze athethe kakhulu. Lesi senzo singabe siveza ukuthi amajaha la asezimisele ukulalela, njalo ukunikeza uyisekazi udlebe. UPhehlani uphakamisa iqhaga eqhubela uyisekazi emkhuthaza njalo ukuthi ahlale phansi acitshe ilanga ukuze athole amandla.
ULomkhono-ke laye uyalamukela iqhaga ahlale phansi ehlise amadino. Siyananzelela ukuthi utshwala-ke buyingxenye yempilo, esintwini. Buyathoba inhliziyo ezithukutheleyo bubuye njalo buhlanganise imideni kuxoxiswane kukhuzwana kuboniswana njalo.
