uMthunywa
Ophezulu Stinta
Umdlalo: Indlalifa Ngubani
Olwalotshwa ngu N S Sigogo
Siqhubeka lomdlalo wethu lapho esitshiye khona inkundla ibuthene ngenhloso yokuxazulula ingxaki yendlalifa. Inkundla yonke nje jikelele isidinga ukuthula phakathi kweguma lakoNdlovu kanye lokuthula nje esigabeni sonke.
Abantu abadala bafulathele imisebenzi emizini yabo bonke bayakuthi gwaqa emzini wakoNdlovu kwabizwa laba abafana abangamahlongandlebe ukuthi bake bazozibutha phambi kwabadala balalele ilizwi labadala kulungisiswe izinto ezixakayo egumeni lapha.
Enkundleni yethu eyesithathu lapha sihlangana lomkhuba wokubhema igwayi. Sinanzelela ukuthi abadala bayizolo labo bebethathwa ngamandla egwayi leli njengoba nje sikunanzelela kusenzakala lalamuhla phakathi komphakathi esiphila kuyo.
Osekuzwisa usizi kanye lobuhlungu kulezinsuku yikuthi igwayi leli selibusa abasakhulayo sebelibhemela nje ukuzilimaza emibilini yomzimba. UMadlimpisi-ke uyakhalima ekhalimela abafo laba asebeguqele igwayi sebelibele lokuthi injongo yombuthano vele ithini.
UMadlimpisi uyalwethula udaba-ke eluqondise kuMphunzo loba nje inkundla yonke ivele isisazi isiqokoqela sendaba okuyikho okubahlanganise enkundleni abathe gwaqa kiyo. Udaba lucacile ukuthi kuhloswe ukuzolungisiswa impahla zikaNdlovu ngokusemthethweni njalo kulandelwa imikhuba yesiNtu.
UMadlimpisi uxoxisana loMphunzo embonisa ukuba kulesidingo esikhulu sokuthi abafowabo labo babekhona enkundleni lapha kukhulunywa ngodaba lolu, njengoba kuxatshenwe ngelayizolo mhlawumbe inhliziyo zabo zazilokhu zibomvu bengafisi ngitsho lakancane ukuthi badibanise amehlo labomdeni.
UMphunzo-ke laye uyamukela elithi uyisemkhulu abephakathi kweguma lapha ezophatha udaba lolu, njengesinqumo esabekwayo uMphunzo kusobala-ke ukuthi lokhu uyakuzwisisa uvumelana lakho. Sekulindwa-ke abafowabo bona-ke osekucelwe uyisekazi uLoMkhono ukuba ayencenga alabhele ukuze babe yingxenye yenkundla le.
