uMthunywa
Silo Ophezulu Stinta
Umdlalo: Indlalifa ngubani?
Owalotshwa ngu N S Sigogo
Siqhubeka ngaphansi kwesihlokwana esithi, Sisempini. Abantu abadala balomlandu omkhulu kakhulu ekwakhiweni kwemizi kanye lemideni yosendo lwesiNtu.
Ngokunanzelela ukuxubana kwamasiko osekuhambe kwabakhona phakathi kwesizwe abantwana balamuhla sebeyekwe nje baba ngumhlambi kazelusile umntwana kamakhelwane akasathintwa muntu, kubanzima lalapho abantu bembona esona kulesidingo sokumkhuza basuka bayekelele nje ngelithi asomntanabo aqhubeke ngokuphambanisa kanye lokuhlanhlatha lamagusu.
Izolo-ke bekuhlukile kakhulu, umntwana ubengowesigaba sonke ekhuzwa nguye wonke umuntu omdala, labantwana bakhona bebekuzwisisa kakhulu ukuthi wonke umuntu omdala ngumzali.
ULomkhono-ke sethunyiwe ukubana ayebiza abafana bakaNdlovu, njengoba nje idale libuthene libalindile. Indaba kumele ixazululwe iphutshe kusale kulokuthula phakathi komuzi wakoNdlovu.
UMadlimpisi ufikelwa yikucaphuka okwamagama lapho enanzelela indlela uMphunzo athutsha ehamba ngayo, aze avule lesifuba sakhe ngelithi kambe uyakwazi na ukuthi yena ulamandla okumemuka lelo lifa ahamba ethwele isifuba eziqakisa ngalo.
Usindwa ngelithi ilizwe linjalo nje alamukeli ngitsho ubundlalifa bakhe lobu kodwa yena kakunanzeleli konke lokhu, ukuthatha nje sengathi konke kuyinhlakanipho yakhe. Kuhle nje ukuthi laye uyananzelela ukuthi okwabiwa kwelifa leli kuyasolisa mpela, akwamukeleki langaphi nje kulesidingo esikhulu sokuxazulula insindabaphenduli yendaba le.
Konke lokhu kungenxa yelizwi elithi eyomdeni ayingenwa, inkulumo zabadala izolo bezilamandla amangalisayo ngoba bezilandelwa. Kungesiyo ethi eyomdeni ayingenwa mhlawumbe ngabe labo bake bazama ukuxoxisana lomufi ukuthi ukunikeza uMphunzo ilifa kwakuzadala ukhophe oluthile olungabangulekiyo emulini.
UMkhulumi-ke laye uyamkhuza ngelithi ehlise ilizwi ngoba bayamutsho nje umfana kaNdlovu ukuthi ulendlebe zethendele hlezi inkonyane ihle nje isikhabe isiganu kusengwa.
