uMthunywa
Ophezulu Stinta
Umdlalo: Indlalifa ngubani olwalotshwa ngu N.S Sigogo
Siqhubeka lodaba lwethu lapho sekufike esigabeni sokuthi kuxazululwe ingxaki okubhekwane layo. Siyananzelela ukuthi uNkala kalahlanga ijogwe ayelethisiwe, uyalithwala loba nje limzungeza lalapho enanzelela ukuthi abafana bakaNdlovu bamkhangelela emanzini lokho akakutshayi ndiva ngitsho lakancane nje. Eyakhe inhloso yikuphumelelisa umsebenzi osezandleni zakhe.
Silokhu singaphansi kwesihlokwana esithi, Size empini. Sesikusigaba lapho uMadlimpisi asebone kungcono ukuthi bathume umuntu omdala ayephuthuma abafana bakaNdlovu ukuze babuye babe yingxenye yomhlangano oqakatheke kangaka.
Inkatho idla uyisekazi wabo-ke uLomkhono ukuthi kube nguye osukuma esiya baphuthuma, loba nje laye engathi uyasola ngelithi kambe babezavuma na njengoba ngelayizolo besuke bejikijelwa ngezikhuni.
Amazwi abadala awokwakha njalo adinga ukuthula aphuma phakathi kwenkundla ephendula uLomkhono athi wona, “kuxatshanwa kuphetshiswane njalo, ababizwa ngulowo abaxabana laye kodwa babizwa yinkundla ebutheneyo”.
Elinye njalo icebo libuya lisithi bekungaba njani uLuphondo lo onguye oyingxaki aqale axotshelwe kude, hlezi isibungu sakhe sivuke njalo siqale phansi lapho esebabona ibuye njalo iqale phansi impi.
Kumbe azibone sengathi yena nguye olelungelo lokuthola impahla lezi uxotshwa nje uyavalwa. Akulula ukulungisisa udaba lwelifa mpela. Kudingeka amakhanda ahlale ezula zula abantu becabanga ngezinga eliphezulu sonke isikhathi ukuze kube lempendulo kuzehlakalo eziphicayo.
Kuthunyelwa uMphunzo ukuthi baxoxisane laye exwayiswa njalo ukuthi azikhuze njalo azibambe lapho abafowabo befika angaze enza lokho ayekwenze ngosuku oludluleyo. Inkundla izama ngazo zonke indlela ukwehlisa impi le abaphakathi kwayo, bavitsha ngapha langapha.
Besephakathi kokuzixoxela nje uMadlimpisi uhle ananzelele ukuthutsha kuka Mphunzo. Bathi uthutsha ephongela sengathi ngumuntu obizwe ngusowabo, kusobala ukuthi nje ubuya elenhloso yokuzokulwa. Indlela athutsha eyiyo yona yenza lenkundla ihle izilungiselele kukho konke nje okuzakwenzakala.
