uMthunywa
Ugwalo: Wangithembisa lami: I N Mpofu
Ophezulu Stinta
Egwalweni lwethu lwesithembiso, kuzifundo esixoxe ngazo siyananzelela ukuthi umlobi ubelenhloso ethile ngokuloba ugwalo lolu.
Bekuyinjongo yomlobi ukuthi aveze okuthile ngempilo kuzehlakalo esifunde ngazo egwalweni. Injongo kanye lezifundo kuhamba kuqondisane okunye njalo kusekelane, sokusiya ngokuthi njengomfundi wogwalo uwabeka njani amagama okuchasisa lokho okulethwa ngumlobi.
Ngelihlo elibanzi siyananzelela injongo emqoka yokuthi umlobi ubehlose ukulimukisa abantu ngobubi bempilo yobugebengu. Kulezi nsuku sinanzelela ukuthi abasakhulayo kanye nje lamajaha sebephatheka kakhulu kumpilo yobugebengu lobudlwangu dlwangu, lapho bephatheka lasebuseleni bebulala bebhema izidakamizwa. Kukho konke lokhu ukuziphatha umlobi uveza ukuthi kakulalifa akukhathalekile ukuthi umuntu angakubona kulenzuzo, inzuzo yakhona iyaphephuka njalo kayilakusasa, isiphetho yikufa kanye lokuginywa yingalo yomthetho. Sikubona njalo ngendlela oPhawundi labo Sayini ababeziphilisa ngayo.
Enye yezinhloso zomlobi emqoka yiyo le ejonge ababathetheneyo, umlobi uyaxwayisa ukuthi kuqakathekile ukuthi bahlale ndawonye kungakhathalekile umumo wezomnotho.
Kulezinsuku ke siyananzelela ukuthi inengi labathetheneyo lehlukaniswa yimisebenzi evuka ezindaweni ezikude lakude okudala ukuthi abathetheneyo bahlale bangenelwe yizilingo ebezinganqobeka abantu bendawonye, sikubona lokhu uMlahlwa esedelela ethuma umfana wakhe kwabo kaNyembezi esiyakwethusela uSolakele.
