uMthunywa
Ophezulu Stinta
Ugwalo: Wangithembisa lami
Olwalotshwa ngu: I N Mpofu
Ngeviki edluleyo sitshiye uMlahlwa engulowo ozama ukuzigeza, ephika esemba phansi ukuthi kungabe kukhona akwaziyo ngokufa kukaSolakele.
UNyembezi waze wambonisa lenkemba yakhe ayeyazi eyiqonda, wabuya njalo waqala ukugagasa kambe eyazi nje eyiqonda inkemba le, kanye lesisusa sayo ize ifike nje ezandleni zikaNyembezi.
Isiziba samazwi siyafika lapho esitsha khona, kwabanjalo-ke ngoMlahlwa. Wezwakala yedwa nje esezibika ngelithi okwamenza wafikelwa yinhliziyo embi, ebuhlungu yikuthi uSolakele lo wayemthembisile laye, kazange amale mhlawumbe okwakuzamenza laye alibale adlulele phambili. UMlahlwa wayelokhu ebambe isithembiso kanti uSolakele wayesedlulele phambili.
Ayekufisa uNyembezi ukukuzwa yikuthi uSolakele wabulawa njani, kuphela qha, lokho-ke kwamtshwaqisa umzimba wathukuthela wagana unwabu. UMlahlwa wananzelela ukuthi lapha kwakungasancedi ukuthi ancenge kumbe nje alabhele, wavele wabhavuma wavuka ulaka ubuganyana bonke bavuka bema ngezinyawo.
UNyembezi-ke wayengakunaki lokho, wayefisa ukuthi ngaleyo nkemba eyacitsha umphefumulo wesithandwa senhliziyo yakhe, kufane lakulesigebengu, lamazwi akhe athi, “loba ungaze ubebanzi njengesidindi somkhonto, ubelukhuni njengetshe ngizakuquma.”
