uMthunywa
Silo Ophezulu Stinta
Siqhubeka ngemibhalo yethu engalotshwanga lapho esixoxa khona ngenganekwane. Ngeviki edlulileyo besikhangela ukuthi ngobani ababesetha inganekwane njalo bezethela obani ngasiphi isikhathi. Lezo ke ngezinye impawu zenganekwane ezibalulekileyo eziyizo njalo ezenza inganekwane zehluke kweminye imibhalo engalotshwanga.
Kesikhangele inhloso kumbe mhlawumbe injongo yokwethiwa kwenganekwane. Nxa sibuyela ekadeni, izolo lapho inganekwanekwane ebeziphakanyiswe khona, zinanzelelwa kakhulu, inganekwane beziqukethe izifundo ezimqoka, bezifundisa kakhulu ngokukhuliswa kwabantwana kanye labantu abadala.
Inganekwane zazigoqa isizwe. Sithathe inganekwane yezinyamazana zonke zomhlaba ezabizana zadibanisa amakhanda ngenhloso yokugebha umthombo wamanzi. Ezinye inyamazana zazingamthembi ufudu zimeyisa ngokuhamba kwakhe ephuza ngapha esindwa yindlu yakhe engethulwayo. Kwaba yisimanga esikhulu ukuthi uFudu nguye owacina esenelise ukugebha umthombo wamanzi wawathola kukanti ezinye zonke zasezehlulekile. Kwakuyisifundo esikhulu ke lesi ukuthi empilweni akweyiswa umuntu ngesimo sakhe. Zazifundisa ke okwamagama inganekwane, ngoba isifundo sasisiba segcekeni emuntwini wonke njalo sibe sobala nje, okudlula nxa umuntu etshelwa ngamazwi ukuthi angenzi ulutho oluthile.
Izolo, abantwana bebezwisisa lula befunda ngemifanekiso yenganekwane izehlakalo ebezitholakala kunganekwane bezidala omunye umfanekiso engqondweni zabo obuletha isifundo ngendlela ecacileyo bonke bezibonela okwenzakalayo.
