uMthunywa
Ugwalo: Wangithembisa lami: I N Mpofu
Ophezulu Stinta
Ngeviki edlulileyo sitshiye uMlahlwa elungisela ukuya eGoli, wayesezimisele ukubalekela amacala akhe ekhaya loba nje abadala besitsho ukuthi icala aliboli, kuye kwakumnyama lokho.
Wayezibona esenyathela umhlaba wekhaya okokucina esevalelisa lentaba zeMoveni lezi. Inhliziyo yakhe yayisimhlophe okwamagama esezibona esesiyadibana labangane bakhe bakudala sebexoxa zonke ezomhlaba ababedlule kuzo.
Wayengazimiselanga lokuvalelisa ngitsho lakuSayini lapha, uSayini wayezabona ngelikanya.
Okwakuzakwenziwa nguMlahlwa yikuhlanhlatha lamahlathi kuthi ke angafika ezithutheni zemaphandleni avele nje azihwithele ibhasikili kungabi ndaba zalutho atshove aze ayengena ngalo kuNgulukudela.
Imbi inhliziyo kaMlahlwa ngeyeyisigebengu esesidlule, isifiso sakhe kwakuyikuthi uPhawundi wamtshiya ezalele impukane, efile, loba nje emfake ubuhlungu, amtshiye elenxeba elalizahlala limkhumbuza yena.
Konke lokhu kungenxa yokuthi wahlubuka. Okutsho ukuthi yena wayeyi nkosi, kufanelwe ikhothanyelwe.
Ephakathi kokucabanga okubi ngoPhawundi kwavela kwaquma ibizo likaNyembezi engqondweni zakhe, lapho wezwa umzimba wakhe utshwaqa, emelwa yinhliziyo, wayengelaqiniso ukuthi uNyembezi wayecabangani lapho akhona.
Lowo mcabango wamenza nje waphelelwa yibo bonke ubuqhawe kanye lokuzitshaya isifuba ayekwenza.
