Ugwalo: Emfuleni Wezinyembezi olwalotshwa nguEzekiel S K Hleza
Ophezulu Stinta
SIQHUBEKA kusahluko setshumi. Lokhu siphakathi kwayo impi evutha okwamalangabi, igazi labantwana babantu ligeleza lemifula. Amajaha amhlophe atshaya ucingo etshayela enkambeni zabo ngelithi kayihlome ngokupheleleyo phakathi kweManama leMapate.
Zahlangana inkunzi zathobelana kwabanzima imibhobho yathula ngokuphela kwenhlamvu, intuthu yayivalile kumnyama khaca, kuyinkungu amajaha eganga lapha-ke ayesekhangelene ngamehlo, kwathi amabhunu la ayebukele zihlabana angena enkundleni aqala umdanso, kwaseyisikhathi sawo sokuzibonakalisa, kulapho-ke okwenzakala khona isigameko esikhulu.
EKaMgandane yahlehla sekumele iyegqiba imibhobho yawo njengoba yayisikhafula inthuthu kuphela.
Bathi ingena ngenxeba, kulapho-ke inxeba elaselivulekile, amaqhawe alitshumi ayevele esethule kwathi amabili aba ngathunjiweyo, lapho-ke okuthiwa ayesechithekile. Amadoda amhlophe ayethumbe induna yamajaha uMgandane, lapha-ke bazizwa sebenqobe impi yonke yaphelela bengasakhathali lokuthi babesebefelwe ngabafo abanengi, ukuthumba induna yazo kwakungumsebenzi omkhulu kakhulu.
Waze waphumisela omunye wamasotsha ngelithi kade ebulala abantu ugandaganda lo onguMgandane, kwathiwa-ke ngaleyomini uzabavusa bonke ababulalayo nxa sebemkhanzinga ngokupheleleyo, kwakusobala, esiphaqeni sesiphofu ukuthi kwaku zakuba nzima mpela empilweni kaMgandane isikhathi esingaka edingwa engatholakali kusala kucace iziga zezenzo zakhe.
Lapho sisithi impi yayilochuku ichukumeza kanye lofileyo, yayingakhethi ophilayo losedlule emhlabeni. Lokhu sikunanzelela lapho sekusehlukaniswa izidumbu ezamasotsha kanye lezabafana beganga. Ezamasotsha kwathiwa zazihanjiswa kuzihlobo ezitshiyeneyo ziyedelisa umoya wazo, zilahle izihlobo zazo.
Kwathi-ke izidumbu zabothebula zabuthelelwa okwenqaba yamahlahla lamabibi alindwe ukutshiswa kwathiwa zazizaboniswa umphakathi onsundu ukuthi wazi ngempela ukuthi isephula mthetho senziwani, umhlamuki ohlamukela uHulumende obusayo uphathwa ngasiphi isandla, njalo kube yibufakazi bokuthi othebula bayaphela egangeni lapha hatshi okokudlala, loba nje leziyana ezinye izidumbu zingasavezwa ukuthi lazo kwazakale ukuthi ziyaphela egangeni lapha.
Lokhu-ke kwakuyindlela yokwenyelisa inhliziyo yomphakathi ukuthi nxa ekhona olephupho lokuhlanganelana labothebula laba abone nje ukuthi wayezadliwa ngamanqe. Uhlangothi ngohlangothi lwalulendlela yalo yokugola lokuxotsha.
