uMthunywa
Ophezulu Stinta
Wangithembisa lami: I N Mpofu
Ngeviki edluleyo sitshiye iyezi elimnyama seliwele umdeni wakoNyathi. Akukho okwakungenziwa ngaphandle kokuthi izihlobo labangane zihlanganele ndawonye zilondoloze umzimba kaSolakele, kwaba yikucitsha kwakhe emhlabeni.
UNyembezi kwakumsinda, kunzima nje khona lokuthi avule umlomo ngesehlakalo lesi esavela nje samtshiya engelamathe. Kwala loyise ezama ukuthi babonisane, kusemasinyane lomkhondo usabambeka, wayengelawo amandla.
Kwathi nje ngolunye lwezinsuku zosizi, okuSonile kuzicambalalele phezu komnewabo kwafikelwa ngumcabango womuntu okwakuke kwahlangana laye ngesikhathi eloSolakele esaphila.
Abantwana bamsulwa kuthi njalo ngalobo bumsulwa babo baluncedo olumangalisayo lasemphakathini, kwabanjalo-ke ngoSonile, engaboni cala kanti usevula indlela yomkhondo.
UNyembezi wafisa ukuzwisisa ngodaba lolu, loba nje ekuqaleni wayekude engafisi ukulalela. USonile wachaza ngomuntu lo abahlangana laye eveza lokuthi umuntu lo wayemesaba okwamagama.
Ngokukhalipha kwakhe konke, langokunanzelela wayesikhumbula kahle isimo sikaMlahlwa loba wayengamazi, kulowo owazi ngokubunjwa kukaMlahlwa kwakuvele kucace lasebusweni bempisi.
OkuSonile kwayicacada lokuthi uSolakele wathutsha esegijima okwamagama ngemva kokuthi yena esexotshelwe ngekhaya. Lapho uNyembezi ayesolela khona kwasekusobala. Konke uNyembezi akuzwa ngoSonile kwamanela.
