Ophezulu Stinta
Ugwalo: Emfuleni wezinyembezi olwalotshwa ngu Ezekiel S Hleza
Siqhubeka ngendaba zesigabeni seMapate lapho esatshiya izakhamizi zibuthelelwe ndawonye lazo zingazi ukuthi kuqhubekani.Zisamangele izakhamizi, zethuswa ngabantu abathutsha phakathi kwamagusu, umlobi uthi kwakungasibantu bodwa laba, wonke umuntu watsha amathe bezwakala ngeliphansi ilizwi besithi sebephelile labantwababo.
Impahla zalamadoda athutsha phakathi kwezinanga zazingatshengisi kuthula ayenikizela ngezinsimbi ezingaziwayo, amehlo la ebomvu gebhu efana lawe ndlondlo. Yaphakamisa ilizwi enye yalamadoda ayenikizela. Yabaqinisa ngelithi bangesabi ngitsho, sasingekho isidingo sokuthi besabe, wayezibonela laye ukuthi kwasekukukhulu ukwesaba ebantwini.
Wethula ukubana njengoba abantu bonke babesizwa ngamalwa ecatsha lawo kanye ayebizwa kuthiwa ngamathororo kwakuyibo.Waqhubeka ngombiko wakhe umuntu weganga waqonqosela ngelithi basebe fumene izikhali ababezithenjisiweyo, ngakho kwasekumele amajaha lezintombi ezivela kuleso sigaba zisukume zigaxe izikhali lezo kuyiwe empini kuyohlaselwa. Abazali bavuma bevele bengumhlanga beqhuqha.
Indoda le yaqhubeka isazisa ukuthi bona ke babengabantwana babo yikho nje bona babehamba phambili becenta indlela yelizwe lenkululeko. Amazwi abuya ethusa abantu ngathi okuthiwa yimpi babe ngakahlangani lakho babekhona bezakubona ngamehlo enyama. Kambe phezu kwalokhu ababekubona kuthiwe kabaka boni lutho ludaba ababezalumisa ngaluphi uhlobo. Imizi yayisizasala ithule duu, kungela bantwana ngitsho, bonke sebeyelwela ilizwe.Umbhobho wawuzakhala emini lebusuku igazi ligeleze indlela yonke abantu besifa beswela ababangcwabayo.
Ngempela sasigcwaliseka isihloko sogwalo esithi kusemfuleni wezinyembezi kambe abantu bezakufa kungekho loyedwa ozabangcwaba sekusweleka nje khona ukungcwabana pho kwakuzabe sekungumhlaba bani lo onjalo. Abathengisi ke ngalesi isikhathi babengasancengwa muntu lawo kwasekuyikudla kwamanqe amadoda afana loSikhonzimali kwakungasela musa ngabo igazi labo kwasekumele lidliwe zinyoni. Ekuqaleni abathengisi babeyekelwa bantantalaze bagcwale indlela kuthwa bayobika kwabanye babo ukuthi indaba zimbi phambili, umumo wawusuguqukile, izinto sezimi ngolunye uhlangothi, umbhobho kwasekumele uhlale enyameni. Abazali baqonqoselwa ukuthi bancedise abantwana kuhle ngendlela eqondileyo eyokusekela abalweli benkululeko yabo hatshi abazothumba ilizwe.
