uMthunywa
Wangithembisa lami: I N Mpofu
Ngeviki edlulileyo sicine sekwehle iyezi elimnyama, iganyana elingu Mlahlwa seliphose ibhenede lavela ngesidindi emhlane esiphangeni sikaSolakele. Lavela labonakala lizinambithela, lasuka layazibhukutshela cala celeni kungathi akwenzakalanga lutho.
Labo abafika bezwe umkhosi bavele nje bafika eseqanda kungasela ngitsho lodokoza, kwase kuyinsuma nsumane indaba, insinda baphendule yendaba.
Kwaba yikucitsha kuka Solakele emhlabeni, lacima iluba likaNyembezi ngenxa yesithembiso sothando. Sinanzelela ubunzima bempilo, ongelamandla akalantokozo, wephucwa konke alakho.
Umbiko wosizi wafika kuNyembezi laye engalindele ukwamukela udaba olufana lalolu, wazizwa ngempela ehluphekile waze wasola lalowo owametha igama elithi Nyembezi, nango sebambe izinyembezi ngezandla.
Njengendoda enjengawo wonke amanye amadoda wazizwa ngaphakathi kwakhe kuqubuka ulaka lokuphindisela, ukulwela isithandwa senhliziyo yakhe.
Wayeselahle konke ayekwenza esejikele lembiza le kude, wayengakukholwa lokho ayekuzwe ngendlebe zakhe.
Omesisi bakhe bamzwela kakhulu uNyembezi bamncedisa ukuthi aphuthume masinya ayefika ekhaya ayehlanganyela lomkhosi.
