![Ukuhluzwa kwengwalo](https://www.umthunywa.co.zw/wp-content/uploads/sites/37/2020/05/books-1-680x375.jpg)
Ophezulu Stinta
Ugwalo: Emfuleni wezinyembezi olwalotshwa ngu Ezekiel S Hleza
Ngeviki edlulileyo sitshiye abafana beganga sebedibene lamasotsha abelungu, uMgandane wavele nje wazicelela ukuthi aqondane lawo lamavaka ayisitshiyagalombili eyedwa zwi, wathi eselwise amajaha amabili amhlophe, uMgandane wazimela nje ukudubula waqala ukuzibhemela igwayi, watshaya amabhunu ngethemba lokuthi ayesemtholile kanti babeziyenga babengabuzanga elangeni mhlalokho.
Engagqize qhakala, wawudobha umbhombho wakhe wawubuka, wahleka watsho nje ukuthi wayesewisela phansi oyedwa, wawuvula kanye kwabonakala inwele zebhunu ziphephuka emoyeni ziphambana lobuchopho, engethuswa layibuchopho lobo uMgandane wabuye njalo wabeka phansi umbhobho wazibhemela igwayi kwangabi ndabazalutho.
Amabhunu ayesilile, athe ebona ukuthi zimbi indaba abeka phansi imbhobho athi okungasikufa kuyini nxa kunje, bazama ukubaleka inyawo zagwenxana. Umfana owafundela ukubamba insimbi etshisayo wawubamba kanye, imiphefumulo yahle yagcwala amahlathi ngokuphazima kwelihlo, aphephuka amajaha amhlophe okwempukane.
Amasotsha ansundu amahlanu ayelokhu ecambalele phansi, wawalanda uMgandane, wawavusa ngelithi vukani zithutha ndini. Ngempela babeyizithutha, kambe nxa babebuye ukuzohlasela abantu abansundu njengabo, bevukelana bodwa bengumdaka omnyama.
UMgandane waba wakala ngamampama ngesifiso sokubavula amehlo la ayebhadwe ludaka. Siyagcwaliseka isitsho sabadala esithi imali yimpande yesono, amadoda ansundu nxa ezinikela impilo yabo kanje ngenxa yemali abayithenjiswa ngabamhlophe.
Amadoda egusu akhuluma njengamadoda, abachazela abafo abangabahlamuki ukuthi bona abalwi labo njalo kabalalwazi lalokhu abakubanga lamabhunu yikho nje bezibona befana labo beduha.
Wathi eqeda kukhuluma labo uMgandane wathi kababotshwe izandla lezi ngezankosi zabo babuyele kulabo ababathumileyo, baqonqoselwa ngelithi bangavele babuye bahlangane labo kusasa bephethe imbhobho babengasoze bathandabuze babezabadubula kungelambuzo.
UMgandane wayeyisilo seganga mpela. Wabuza amadoda ansundu ukuthi bayalazi na igazi lomuntu, wababonisa izibunu zenyoka. Wafika kwababili ababelokhu beqhatsha wabaquma okwembuzi wakhongozela igazi walinatha phambi kwabo bekhangele. Bayifunda ivaliwe, abazange bafise khona ukuthi baqhubekele phambili ngokukhuluma, babona kwenela. Bafisa ukuthi umhlaba ubaginye kodwa umhlaba wabaphika wathi esenu asikafiki.