Ophezulu Stinta
Ugwalo : Emfuleni wezinyembezi olwalotshwa ngu Ezekiel S.K Mkhize.
Ngeviki edlulileyo sitshiye uSikhonzimali segijime ngontshelelezane walubhekisa koNdlebe zikhanyi langa. SikoMakhomba lapha amajaha aziphumele, alibele nje.Indaba eyayisegudwini kwakuludaba lwamajaha la ayehlala eguswini ehuba ngezisu okwenyoka. UMakhomba uyabuza enkundleni yamadoda lapha ukuthi ukhona na osewake wahlangana lawo la madoda enkundleni yokulwa. Isotsha elimhlophe lezwakala lisithi lona ke lalifisa kakhulu ukungena enkundleni bake baqondane labafana begusu laba yikho nje eziqinisa ngelithi uhambela lapho okwakulomkhondo wabo ngenhloso yokuthi laye ake azithole phakathi kwenkundla yinye ziqondane ukuze aphume engozitshaya isifuba.Wayekhuluma ngelozithembayo ngempela ukuthi lanxa wayengahlangana lawo lawo majaha kwakumele njalo kusobala ukuthi nguye owayezanqoba, aze nje alinganise ngelithi kambe nxa engazula engajimbi lutho unkosikazi ngekhaya wayezamukela ngaliphi. Yinkulumo yomuntu olokweyisa le ongamboniyo omunye umuntu njengomuntu olamandla laye awokulwa anqobe, lokhu kugcizelela ukuthi abafana beganga laba babevele bona bengenziwa bantu.
UMakhomba laye wayebomele ngempela abafana beganga laba. Ayekufuna ke yena yikuziphindiselela ngomntanakhe owabulawayo. Isicelo sakhe yikuthi abanjelwe oyedwa zwi, bamlethe ephila ukuze azoziphindiselela mathupha.Besaphezu kodaba watheleka engadlanga nkotshana uSikhonzimali ethwele umbiko otshisayo. Wabika enkosini ukuthi amadoda eganga ayelapha ngemva lomuzi wakhe. Amadoda amhlophe ayesevuse imihlonga ebuzisisa ukuthi ngempela ngempela wayeqinisile na. Wagcizelela uSikhonzimali ngelithi babebonwe ngunkosikazi wakhe, njalo kwakubonakale amajaha amabili. Ngaleso sikhathi kwaphela wonke amahlaya kwasekuvuke umhlonga kusotsha lomlungu.
Ngokuphazima kwelihlo kwatshaywa ucingo sekubizwa abanye ukuze kubuye amanye amasotsha azokuma leqembu labo kuyezingelwa isilo lesi. USikhonzimali uthi kwakubonakale ababili kuphela, sinanzelela abamhlophe bebizela ukuthi kuze elinye iqula, kusobala nje ukuthi loba babeziqhenya ngokuyangena enkundleni babe ngawathembi amajaha la, kwakumele babophe ziqine. Kwakhitshwa amadoda angamatshumi amabili azohlanganyela lalaba ababevele koMakhomba.Kwaqonqoselwa ukuba umsebenzi wenziwe masinyane isilo singakanyamalali. Bahle baqonda emzini kaSikhonzimali ukuyazwisisa ngomkhondo walamajaha. UMancube waphendula ngendlela eyabasuthisayo ukuthi ngempela wayebone uqobo ulwabo. Baliqonda idwala ababebonakale kulo,njengoba nje babecambalale balubhekisa lapho ababevele khona, bezwa ukuthi iphimpi elinguSikhonzimali laselize labo abamhlophe.
