Ophezulu Stinta
Ugwalo: Emfuleni wezinyembezi olwalotshwa nguEzekiel S Hleza
Ngeviki edluleyo besiphakathi kwesihloko sesithupha. Besitshiye umbuzo omkhulu ukuthi kambe aluba uDelimpilo wayephila babezanathisana amanzi na lomfowabo owayesebenzela umbuso wamabutho.
Kulapho esithola khona isifundo esikhulu okwamagama esithi ezombangazwe ziyawehlukanisa umdeni ziwudabule phakathi. Kulapho njalo okucina kubonakala abantwana bomuntu munye bedabulana bexhanxathana bevukelana okwezilo.
Abangena kuzo kuyikuhlakanipha ukuthi bananzelele ukungena ngenhliziyo batshone kuyaphela ubuhlobo kuphele umdeni. UMaMoyo uzama ukuxoxisana loSidingani umntanakhe ngelithi wayekubona kungcono atshiye isisotsha adinge omunye umsebenzi.
Kusobala ukuthi umsebenzi wakhe wawusumngene okwamagama umfana kaMalandu njengoba esitsho nje ukuthi yena ngeke aphike ngabantu abangela lwazi lokuthi vele impi kuyini, yena injongo yempilo yakhe sekusobala yikulwa impi. Siyananzelela njalo ukuthi akusekho ukuvumelana kumbe ukubona ngalihlo linye phakathi komzali lomntwana ngenxa yezombangazwe lezi.
Umzali kaselawo amandla phezu kwabantwana, kulapho njalo esibona khona ukuthi uDelimpilo wayengasoze atshiye isikolo elanda ezombangazwe aze acine esifa ngendlela ebuhlungu kangaka, aluba ilizwi lomzali laliselawo amandla kwakungasoze kufike kuleso simo esibuhlungu kangaka. Siyananzelela ubuhlungu obubelethwe yizimpi.
Kuyavunyelwana-ke phakathi kukaMaMoyo kanye lendodana yakhe ukuthi kuhanjiswe umbiko wemfa kuMalandu owayelokhu evalelwe enkantolo. USidingani kwasekumele kube nguye odlala indima yobudala egumeni lakwabo.
Umumo lesimo uyabakhulisa abantwana ubafake ezingeni labadala, okuqakathekileyo yikuzehlisa kanye lokulandela okuyikho okulaywa ngabazali njengoba lesitsho siqinisa ukuthi ilizwi lomzali kaliweli phansi. USidingani ubuya akhihlize indaba esindayo ngelithi yebo wayehamba ukuyakwazisa uyise ngemfa kodwa-ke wayelohlupho lokuthi bona kabawelelani enkulumeni lapha, ngenxa yezombangazwe lezi.
USidingani wayengafisi ukuhlanganisa ubuso bakhe lobukayise, kambe sekuze kufungelwane ijoyi egumeni ngendlela enje. Amazwi omfana awasatshengesi lokuthi ukhuluma ngoyise, sekungani ukhuluma nje ngomunye umuntukazana ameyisayo.
