
Ugwalo: Emfuleni wezinyembezi olwalotshwa ngu Ezekiel S K Hleza
Ngeviki edluleyo sitshiye emazibukweni omfula uThuli kwehle ithunzi elimnyama, ithunzi lokufa, ithunzi elingela themba kophilayo loba kwakuthwe kuzahlanganwa kwelizayo ilizwe elilokuthula.
Abafana babefe belucacaca behazwe ngokufa sengathi kwakuhazwa impukane zeganga nje. Isihelo sasingekho emabhunwini, konke kwakuyikufisela isizwe esimnyama ukufa kuphela. Isenzo sokufa kwalaba bafana kanye lomphathisikolo wabo saba yindaba esegudwini kukanti kuyisenzo esihlasimulisa umzimba njalo.
Akhona amazwe ayengahambelani lombuso wabamhlophe, la ngamazwe eSoviet Union ngaphansi kwebandla lamakhomanisi athembisa-ke ukunika amazwe ahlaselweyo izikhali kanye lokubafundisela amalunga azo ukulwa impi ngekhono elilohlonzi.
Amakhomanisi-ke wona ayezimisele ukuma labantwana abansundu beZimbabwe. Abazali babantwana ababulawa bengekho bazidonsa beqonda emfuleni uThuli. Lapho bafika behlisa izinyembezi zageleza phezu komlotha kwathi ezinye zageleza lamanzi omfula uThuli, kulapho esibona khona ukugcwaliseka kwesihloko sogwalo, esithi Emfuleni wezinyembezi.
Kusemfuleni lapho okwehla khona isiga esibuhlungu, kusemfuleni lo lapho abazali ababubula khona bekhangele abantwababo bebulawa kwathi lalabo abantwana ababulawayo inyembezi zabo zageleza kabuhlungu kulowomfula.
Sibona kulesisehlakalo umlobi asilethela khona ngesihloko sogwalo, zageleza inyembezi zosizi. Kwaqubuka ubuhlungu obuphindiweyo kwabansundu, kwabekwa insuku zokuzila amabandla eyibambe ngomkhuleko kanye lokuncenga uThixo ukuba kakungabuyi ngamandla aphezulu kwalokho abasebekubone ekuqaleni.
Kwakuncengwa ngelizwi lokuthula lokuba kungaphindi kwehle iyezi elimnyama ebantwaneni beNkosi. Phezu kwalokho amakhomanisi ayeyibiza impi ebizela ilizwi lokuthula ngempindiselo. Pho isizwe sasilubhekise kuphi nxa kunje, yiluphi uhlangothi olulamandla ozwi lakhe luzathatha inkezo elizweni labansundu?
Kwasekucacile kanye lasesiphongweni sembuzi ukuthi lapha kwasekuyimpi, ukuthula kwasekuyimbali njengoba wayevele watsho umntwana webhunu ukuthi ukuthula kwakuphele du. Bakhona abasebekhethe ukumela usendo lwabansundu kukanti ngokufanayo bakhona njalo abasekhethe ukuba zimpimpi zamakhiwa badle ngegazi labafowabo. UMasolombana wahle wayabika lingakatshoni ngakoMaMoyo ukuthi zimbi ndaba akusabuyelwa muva kungemanzi.