Ophezulu Stinta
Ugwalo: Emfuleni wezinyembezi olwalotshwa ngu Ezekiel S K Hleza
Siqhubeka ngesahluko sesihlanu. Ngeviki edluleyo sitshiye isigaba sonke sesibizelwe emazibukweni omfula uThuli umuntu wonke kwakubalulekile ukuthi ayezizwela ngezakhe indlebe. Kwakungasibutho elalilapho, laliyitshebetshebe lihlome liphelele umfula ukhazimula ngemibhobho kunyakaza ibhiza liyimpukane.
Kwakusobala ukuthi isimo sasingasihle. Ngokuphazima kwelihlo wasukuma umphathi webutho waphakamisa ilizwi lakhe ukuze abantu bonke baziswe lokho ababuthene ngakho. Kazange axhanxathe ulimi, wawabeka aba sobala amagama echaza ngelithi kunengi akade belokhu bekufihle emgodleni osekufike esikhathini sokuthi akusafihleki, uphondo seludabula umgodla.
Wayithi bhadla ethi ukuthula elizweni kwasekuphelile ngakho ukuphela kokuthula kutsho impi. Wakhuluma engathikazi ngelithi abantwana babaNsundu babehambe bayafundela ukubamba inkafulakufa bayifundela kubi ngoba ngayo babulala usana kanye lexhegu elidondolozelayo. Abamhlophe-ke bona babewufundele kuhle ngoba babekhetha okumele adutshulwe. Kwakungasonkulumo enhle kumbe encomekayo ngoba yonke yayichitha umphefumulo wesidalwa esingumuntu.
Wabuye njalo wagcizelela ngelithi isenzo sabantwana abansundu sasesidale ukuthi kubulawe yonke inzalo yonsundu ekhasayo lengakazalwa ibe yikudla kombhobho. Kukanti basevele sebephiwe imvumo yokucacada lonke uhlobo lomuntu onsundu.
Iqala lapha indaba ebuhlungu equma ethunjini kuhele kozeleyo kuze kuhele sibi sokhalo lwenyumba. Abantwana besikolo babefolisiwe bebotshwe izandla ngensimbi kuyilabo ababanjwe sebeseqa bethi bayakhulula ilizwe labo. Usizi lwalubhalwe emkhathini kunuka ukufa.
UMaMoyo wambona uDelimpilo wakhe efoliswe kanye labanye abafanyana wayifunda ivaliwe. Bathelwa iphethulo yageleza umhelo wavuka phansi uthando lomzali lwamnika isibindi lamandla okulwela indodana yakhe. Isimanga uDelimpilo wayengethuki kodwa wema isibindi wanga unina wamthembisa ngelithi bazahlangana ezweni elilokuthula njalo elikhululekileyo.
Yena nje uDelimpilo ujabulela ukufela ilizwe lakibo. Ibutho lomlungu lalingela sihelo lapho bebona ukuthi uMaMoyo wayephambanisa uhlelo lwabo bavele bambophela emoteni ukuze baphutshe ngenhloso yabo. Umphathisikolo wezwa kuhela lakuye wazama ukuncenga induna yomlungu ngelithi bekulani abantwana laba balobele ejele kulokufa ngesihluku esingaka. Wayetshaye edwalweni umphathisikolo. Lwakhala uhlamvu lwaqothula abafana babaluyaca phezu kukamphathi wabo. Kwathula kwathi cwaka.
