uMthunywa
Ophezulu Stinta
Siqhubeka ngodaba lwethu loSolakele lapho esimtshiye njalo esenze elinye iphutha lokwamukela imphahla ezazivela kuMlahlwa, singathi leli bekulithuba lokubukela uNyembezi, ongumkakhe ngobunzima bodaba lwakhe loMlahlwa njengoba nje sibona uMlahlwa laye wayeseqale ukugilela uNyembezi imkhuba ethile.
Wayezama ngamandla wonke uSolakele ukufihla ukuthi kukhona okwakumudla kodwa ke kwasekusobala kwaba segumeni ukuthi kukhona okwakumudla ngaphakathi loba nje wayengakuvezi.
Umgulukudu onguSayini uhambela phezulu udelela umuzi wakoNyathi esiyangena, ngelokuthi wayethunywe ngumnewabo kaSolakele.
Sinanzelela ukuthi uSolakele ubuya aqilwe ngokwethuselwa nguSayini ezenza yena ofisa ukumncedisa kungamanga aluhlaza tshoko.
USayini utshiya isivumelwano sokuthi uSolakele ayehlangana loMlahlwa, wavuma laye uSolakele elokhu eziphosela phakathi komjibila ohlabayo.
USolakele ulungisela ukuya eFredi lapho azimisele ukuhamba khona yedwa ngelokuthi kwakungeke kuthi kukhangalelwe imsebenzi eminengi egumeni kube labantu abaphelekezelanayo.
UXotshiwe wayelesifiso sokuphelekezela. Uninazala wahle wabona ithuba laye aphathise iqhiye yakhe njengoba uSolakele esiya ezitolo.
Walala ke elungisele ukuthi uzavukela eFredi.
