uMthunywa
SIYAQHUBEKA ngodaba lwethu lapho esitshiye khona uMzila eseselizweni laseJelimani lapho udaba lweZimbabwe olwalusegudwini khona.
UMzilakawulandelwa wayeseqala laye ukuba lethemba empilweni yakhe, njengomuntu owayesedele okunengi ngempilo yakhe wazizwa esiba lamandla amatsha lapho esezibona nje laye ukuthi wayesezahamba lapho ayesenelisa khona lapho ayefisa khona njengabo bonke abantu.
UMzila waba lenhlanhla yokuthola umuntu olomusa onguye owayemncedisa ukuhambisa unyawo lwakhe. Ababili laba babalesikhathi esihle kakhulu sokuxoxa ndawonye ngezamazwe abo atshiyeneyo.Kwakumangalisa ukuthi uCarlos lo wayelandisa ubuhwaba obabugqagqele ilizwe leZimbabwe sengathi laye wayehlala kulelo lizwe. Wayelolwazi olubanzi ukuthi labo ababenothile babegqilaza njani abaswelayo.
UCarlos lo wayeyindoda eyayimnceda ngonyawo lwakhe.
Indoda le yabuya njalo yamlethela indaba ezimnandi emazisa ngokuthi impilakahle yayisiseduze elizweni leZimbabwe ngoba uzibuse wayevele esenuka emakhaleni abantu.
Wamthembisa ngelizwi elilethemba lokuthi babeseduze lokuhlala ngokulinganayo kungasela ngitsho loyedwa owayezancindezela omunye. UMzila waba lesifiso esikhulu sokwazi ukuthi indoda le yayizizwa ngaphi zelizwe elalikhatshana kangaka.
Umnumzana lo wamphendula ngelithi akukho ngitsho lokukodwa ababengakwazi ngelizwe leZimbabwe yikho nje babebazwela ngendlela ababebazwela ngayo. Isizatho sokubasiza sasivelela ekuthini bona kwelabo ilizwe abantu babephila ngokulinganayo kungekho okwakuthiwa uphezu komunye.
Okunye njalo okwakumqoka yikuthi babenanzelela njalo behlonipha abansundu ababezama bezinikela ngempilo zabo bezama ukuzikhulula kulobu bugqili ababephakathi kwabo.
Kwakuluhlelo lwamaJelimani ukuphathisa amazwe abansundu ukubakhupha esandleni sencidezelo ngesifiso sokuletha ukuthula lokukhululeka kulaba bantu.
UMzila laye wazithola impendulo zemibuzo eyayigijima ekhanda lakhe. Baxoxa-ke laba ababili saze saphela isikhathi sokubhoda phandle.
