uMthunywa
SIQHUBEKA logwalo lwethu lapho esizathi ukukhangela izifundo esizithola kugwalo lwethu ngemva kokulufunda kanye lokulucubungula ngendlela ejulileyo. Nxa sinanzelela umlingiswa wethu omqoka uMzilakawulandelwa, sifunda okunengi ngomlingiswa lo.
Ukuqakatheka kokuzimisela yisifundo esimqoka okwamagama. Kukho konke umuntu afisa ukukwenza, elenhloso yokufeza injongo ezithile kuqakathekile okwamagama ukuthi umuntu azimisele anikele langezinto ezibalulekileyo empilweni yakhe. UMzila wafulathela imuli yakhe wafulathela inkosikazi yakhe uthando luselutsha ngenxa yokuthi wayesehlose ukukhulula ilizwe lakibo esefuqwa yikulwela inkululeko yabantu abansundu, wadela konke wathwala isibhamu waqonda amahlathi.
Okunye njalo sifunda ngokuqakatheka kokubamba isifuba, kanye nje lokukhuza uvalo lapho umuntu ehlangana lezehlakalo ezinzima. USethekele wathi esenanzelele ukuthi isigulane esasisesibhedlela kwakungumyeni wakhe, wazibamba, kazange futhi laye ahle ahugeke ngokuziveza kuleso sigulane, ngoba leso kwakungaba yisenzo esasingabachitha bobabili bahle nje babe yikudla kwesitha.
Emva kwalokhu siyafunda njalo ngokuqakatheka kokucabanga okujulileyo, lapho sekumele kuphume iqhinga lokuhlenga umphefumlo, sinanzelela njalo lokuqakatheka, kokuhlela amaqhinga labantu abalolwazi okuyisifundo esimqoka kakhulu, ukuthi umuntu akumelanga nje abhudlukele loba ngubani nxa lapho esezithola ephakathi kohlupho olukhulu yisifundo sibili ukuthi kuqakathekile ukuhluzisisa abantu abalolwazi olujulileyo, yikho nje uSethekele simbona esizwa nguSicelo ngamaqhinga ezinga eliphezulu okwamagama.
