uMthunywa
SIQHUBEKA ngokucubungula indikimba zogwalo lwethu. Silokhu sikhangela indikimba yothando. Sixoxe ngothando lwesizwe, lothando lomphakathi, kanye lothando phakathi kwabantu ababili abathandanayo.
Egwalweni lapha njalo sinanzelela uthando olukhona phakathi kwezimuli. USethekele kanye lomzawakhe uSimilo benza isinqumo sokuhlenga uMzilakawulandelwa, babopha amaqhinga ayengabafaka phakathi kobunzima, amaqhinga njalo ayengachitha impilo zabo njengoba basebehlokoza ulimi lwesitha esasikhamise umlomo sivule amazinyo esabekayo.
Lokhu babekwenza befuqwa luthando lomdeni, abazange badele kumbe baphelelwe ngamandla. Benelisa ukumtshontsha esibhedlela lapha, benelisa njalo ukudabula amagusu bequma laye phakathi kwezilwane, waze wathola usizo, waze wayathola ukwelatshwa ngenxa yokusizwa luthando lomdeni.
Uthando luyaqhubeka njalo egwalweni lwethu, lapho esibona khona uthando olukhona phakathi kwabantu abasebenza ndawonye. Abafowabo bakaMzila bathi bebona ukuthi wayeselimele kakhulu njalo esephakathi kobunzima bokuhamba abazange bambone njengomthwalo.
Babona laye elelungelo lempilo. Kwakungalula ukuthi umuntu athole usizo ngesikhathi sempi kodwa-ke abazange balahle ithemba ngomunye wabo, baqhubekela phambili belesifiso sokuthi abelempilo ende.
Kulapho esibona khona uMzila kuqala indlela zonke zokuthi aze athole usizo acine njalo esehlangane lemuli yakhe laye wayibona iZimbabwe entsha, ilizwe alilwela ngempilo yakhe yonke. Uthando luyindikimba emqoka egwalweni njalo lufeze lwagcwalisa injongo zomlobi ezithile.
