uMthunywa
SILOKHU siqhubeka ngendikimba zogwalo lwethu. Sinanzelela indikimba, uthando. Indikimba le ivela ngendlela ezehlukeneyo, ngendlela ezinengi njalo. Sinanzelela uthando lokulwela ilizwe kanye lesizwe sabantu abamnyama, abantu abansundu.
Yikho lapha esihlangana khona loMzila kanye labafowabo, bequma amagusu bephambana lezilo zeganga, bekhuthwa zinhlamvu, benikela ngempilo zabo. Konke lokhu babekwenza ngothando lwelizwe kanye lokuthanda usendo olunsundu.
Ukuzinikela abakwenzayo kwakungokwezinga eliphezulu. Siyalubona njalo uthando phakathi kwabantu ababili abathandanayo, uSethekele kanye loMzilakawulandelwa. Ababili laba ababetshadile basebesehlukaniswa lubizo lwempi, uMzila laye eseholwe luthando lokukhulula isizwe sakibo, kanye lelizwe lakibo. Bobabili lapho esihlangana labo kundawo ezitshiyeneyo, omunye lomunye udinga omunye wakhe ngenhliziyo ephuphuma uthando.
Uthando lolu silubona lapho uSethekele ebopha njalo ephumelelisa amaqhinga athile ukuze akhuphe njalo aphephise isithandwa sakhe. Balutshwana kakhulu abesintwana ababengazimisela ukuthatha isinqumo esikhulu kangaka njengalokhu okwenziwa nguSethekele, ebopha amaqhinga okukhipha umyeni esibhedlela, phakathi kwabonogada abayiziqhwaga ababelinde isibotshwa lesi.
USethekele kazange aphelelwe ngamandla kumbe adele loba wayebona ubunzima ayengahlangana labo. Isibindi sakhe sasiqhutshwa luthando ayelalo emuntwini owayekhethwe yinhliziyo yakhe. Laba bobabili bayisibonakaliso esimqoka sothando lwabantu ababili abathandanayo njalo bekhangelele ukwakha.
