uMthunywa
SIQHUBEKA ngendikimba emqoka indikimba yempi. Sinanzelela uMzilakawulandelwa esehlukana loSethekele ngesikhathi beqala ukuqinisa umuzi wabo, kwasekubalulekile ukuthi uMzila angene amahlathi ayohlanganela kanye labafowabo ukuyalwela ilizwe lakibo kanye lenkululeko yabantu abaNsundu.
Lesi-ke ngesinye sezibonelo sokudilika kwemizi kanye lemitshado yabantu, okwakudalwa yindikimba yempi. Abasilisa abanengi okwamagama baphela, bachitheka, bafa baphela ikakhulu sinanzelela impi yaseJiba Jiba, kusobala ukuthi izingane ezinengi zasala zingelabo obaba, kukanti njalo abesifazana abanengi batholakala sebengabafelokazi omkabo sebephelile empini.
Sinanzelela njalo kusiba lokuthengisana kwabantu, umphakathi uphelelwa yikwethembana lapho kusiba labantu ababevukela abanye babo abansundu besiba zimpimpi zebutho lesitha, isenzo esifana lalesi sasiletha ukungazwanani kanye lokungahlaliseki kwemiphefumulo eminengi.
Sinanzelela amadoda ayegcine uMzila esibhedlela babemlindile njalo bembamba ngesandla somuntu olecala, umuntu owonileyo kodwa ngeqiniso elimsulwa uMzila yena-ke wayelwela inkululeko yabantu abamnyama. Babe ngonogada bengelayo inhliziyo yokukhulula omunye wabo, bengela ndaba lokuthi mhlawumbe bazwisise ngesisusa sendaba yakhe aze azithole nje esezandleni zesitha.
Impi-ke yadala inhliziyo eziguquguqukayo ebantwini, sinanzelela isinqumo esathathwa nguSethekele lapho sekumele ahlenge umkakhe ezandleni zesitha, isikhathi sempi sasinika abantu isibindi esingavamanga, isibindi esiyingozi nje sona ngokwaso, lamaqhinga angajwayelekanga empilweni. Konke lokhu kwakufuqwa yindikimba yempi.
