uMthunywa
Siyaqhubeka sikhangela abalingiswa bethu abamqoka, esinanzelela ukuthi yibo njalo abayinqola ehambisa lolugwalo.
Sesike saxoxa kabanzi ngomlingiswa omqoka, umlingiswa onguye obambe ugwalo lwethu ngendlela ephakemeyo. Uqala lalo ugwalo aze afike emaphethelweni, oba nguye njalo ofeza injongo ezibanzi kanye lendikimba ezimqoka.
Okunengi ngomlingiswa wethu besinanzelela ukuthi ubengumuntu wezimpi, engumuntu wesibindi, kodwa njalo sibuye sinanzelele olunye uhlangothi lwakhe.
UMzilakawulandelwa wayelayo inhliziyo yothando loba wayedabula phakathi kwezihotsha ezincinyane edlula phakathi kobunzima, inhliziyo yakhe ayizange ngitsho yamlibala uSethekele wakhe, wayelokhu elaye emcabangweni emkhumbula mihla ngemihla. Kazange adele, wayefikelwa yinhliziyo ebuhlungu lapho ecabanga ngaye abelephupho elide nje ezibuza ukuthi kambe wayezakufa wahlangana laso isithandwa sakhe. Kwaba mnandi ngelanga abahlangana ngalo, umhlaba ababekiwo loba wawule zindunduma, bephakathi kweziphithiphithi, bona bazithola bephakathi nje kowabo umhlaba uthando luvutha.
UMzilakawulandelwa wehlisa inyembezi zothando, lapho esebone isithandwa sakhe senhliziyo. Uthando lwakhe kuSethekele yilo oluveza ukuthi njengomuntu wonke wayelengxenye ethambileyo, eyayisakha inhliziyo elothando.
