uMthunywa
SIQHUBEKA ngokukhangela, silandelela abalingiswa bethu abamqoka. Silokhu sisaxoxa ngomlingiswa wethu, uMzilakawulandelwa esinanzelela ukuthi wayengumlingiswa owayelesibindi.
Okokuqala sinanzelela ukuzimisela kwakhe ufulathela izihlobo, isithandwa sakhe ezinikela ukuthi ayolwela ilizwe lakibo. Sinanzelela lalapho ebona abebutho loncindezelo behlasela abafana benkomo ababehlangana labo endleleni, yena kazange ahle abaleke kodwa simbona egaqa ngamadolo elunguza ukuze abone asuthiseke ngalokho ayekubona.
Lakanye walubona uthuli lwenkomo lutsholobela, lokhu wayekwenzela ukuthi abelesiqiniseko sokuthi kwakusenzakalani, njalo kwakungobani laba ababehlukumeza izakhamizi ngemfuyo yabo.
Kungomunye siyabe sikhangelele ukuthi wayezahle aphume ngentutshana, abalekele ukusiza umphefumulo wakhe, njengoba kwakusobala ukuthi lapho isitha sithe sahlasela sasiqothula imbokodo lesisekelo.
Ngesikhathi elunguzile wayelunguze ngapha esekhokhe umtshina wakhe waphelela elindele nje ukuthi ongenayo wayehlasela, ekhombele emnyango okokuthi ngalelolanga kwakusifa olecala longela cala. Kungakaze nje kuthini bathutshelwa yindizamtshina yenhloli okwakusobala ukuthi yayibabona njalo lenhloso yabo isobala, kwathi nje isisolobele labo bahle bandiza ngehlathi ngoba kwakungaziwa okwakuzalandela ngemva kwalokho.
