uMthunywa
Siqhubeka lodaba lwethu nje selulanda emaphethelweni. Silandela isahluko sethu sesitshiya galo mbili lapho uMzila esehlangene khona labanye abafo sebexoxisana ngezikhathi abadlula kizo babuye njalo bathinte okungaba yingqubekela phambili bekhangela ngezokukhulula ilizwe kanye lesizwe sabansundu.
Siyamnanzelela-ke esefikelwe yisethekeli uMzila, indoda le eyayimethekelele yazibika-ke ukuthi yona yayihambela abantu abanjengaye abalimalela emsebenzini omkhulu kangaka belwela inkululeko yabaNsundu.
Wamazisa njalo ukuthi amabizo abo ayesebhaliwe engwalweni zabenkululeko kukhangelelwe ukuthi bathole isibongo sabo lapho iZimbabwe isithole uzibuse.
Kwamthokozisa lokhu uMzila ukuzwa ukuthi umsebenzi wabo wawuncomeka ngendlela enkulu kangaka.
Okunye njalo okwanika uMzila ithemba yikuthi indleko zokwelatshwa kwakhe zazingaphumi kwesakhe isikhwama kodwa bakhona ababekhangele leso sigaba.
Uthando oluqotho lwalu lokhe lumhlupha ngaphakathi, wayesizwa konke ngamalungiselelo ayesenziwa kukhangelwe ukunakekela impilo yakhe kugxilwe kakhulu ekulimaleni kwakhe, ngaphakathi wayekhathazekile ngoSethekele wakhe.
Kwakunzima ukuthi lalapho yena ezibona esethole uncedo alibale isithandwa sakhe, inhliziyo yakhe yayikude lokudela. Yikho lapha esinanzelela khona ukuqakatheka kothando empilweni.
Wayebuzwa ubuhlungu bokuthi wayengeke ambone umkakhe lapho esethe waya emazweni, kwakuzakuba nzima kakhulu ukuhamba engazange ambone. Siyalunanzelela kakhulu uthando lweqiniso lapho sibona indoda isisehlisa inyembezi ngobuhlungu bokucabanga isithandwa sayo.
