uMthunywa
Silokhu siqhuba ugwalo lwethu sihamba lomlingiswa uMzila kawulandelwa, obelokhu elindwe ngamapholisa esibhedlela bezophisana lokumlinda lokhu. Wayesenanzelele ke ukuthi amapholisa la ayemlinda ayengamthandi ngitsho. Lendlu le ayehlala kuyo yayihlala ihluthulelwe sengathi kuhlala isigebengu phakathi kwayo. Konke lokhu wayekubona njengobuwula kambe wayengabaleka esiyangaphi yena ebotshwe izandla lenyawo.
Yayinzima impilo yesibhedlela loba nje wayelethwe lapho ukuzothola usizo konke kwakusuka kudunge lolosizo ayelukhangelele. Kwakuthi lalapho umongikazi efika phakathi kobusuku wayebuza epholiseni ngonyawo lwakhe ipholisa elalivele nje lingazihluphi ngitsho ngobuhlungu ayedlula kibo.
Impendulo yepholisa ke yayivele nje imbize ngelenja into engelancedo kulapho ke ezwa khona ukuthi yena wayevele egcinelwe nje ukuthi aveze imfihlo yonke ayelayo yona kanye ababeyidinga beqeda lapho babezamgongoda okomgaxa. Pho endaweni enjalo ukusila kwakungavela ngaliphi kuvelela ngaphi njalo.
Ukhona umongikazi owayelethela amapholisa la itiye eyayinathwa yizisebenzi ebusuku wayemuzwa nje ngokwehlisa ilizwi lapho esethe wafika, wamuzwa langelinye ilanga lapho esithi vele isigulane leso sasigcinelweni siqeda ukudla kwezigulane, kwakunani ukuthi bahle bamdubule nje kuphele ngaye.
Lapha siyananzelela ukugubha inkulumo okwakusenziwa ngunesi lo ngoba kulapho okwahle kwavela khona egcekeni injongo yabo abesitha ngokuletha uMzila lapha esibhedlela, babelenhloso engaphezu kokunceda umphefumulo owawuphakathi kwenhlungu. Kulapho uMzila azizwa khona efikelwa yikwesaba wafikelwa layikugcwalelana, loba kwakungela lutho ayengalwenza ngalokho.
Kwathi ke ngemva kwensuku wethuka okwamagama lapho esebona umongikazi ayemfanise loSethekele engena kulindlu yakhe ayegcinwe khona. Lo laye wayebophe ubuso mfi engafuni ngitsho lokwandisa ingxoxo laye, umongikazi lo laye amazwi akhe ayefana xathu lalowana owebala bonke babehlabela ingoma yokuthi kabulawe wayevele egcinelweni. Lapho ke uvalo lwamtshaya lwamdabula wazizwa efisa ukuthi ngabe umhlaba ngabe wawungamginya.
Akunanzelelayo ukuthi wayethi nxa ezonika ipholisa itiye yehola letshumi kwakusiba lenkulumo eziqumba qumbayo azababone lepholisa leli selimoyizela lisifa ngenjabulo ngaphakathi njengoba lomongikazi lo wayebunjiwe emuhle okwamagama.
