uMthunywa
Olwalotshwa ngu B D Ndlovu
NGEVIKI edluleyo sitshiye abathathu esiqhubeka labo kulolu hambo sebezithele phakathi kwesinanga sohlupho.
Ngokungazi bazithola sebephakathi kwendawo okungaqunywa kiyo, okuvele kubekwe lemithetho yokuthi kwakungafanelanga kube lomuntu obhadula kuleyo ndawo ngemva kwamahola athile.
Basebephakathi kwalobo bunzima-ke oSimilo laboMzila.
Sinanzelela njalo obunye ubuhlungu kanye lobunzima obabukhona ngesikhathi lesi esempi. Imithetho eyayifakwa ngababusi yayivele ingameva enyameni yomuntu onsundu, yayihlaba okwamagama, itshotshozela sibili.
Umuntu kwakungasamelanga azithole elohlupho kumbe isidingo esasingamenza adlule kulezo ndawo ezazilemithetho.
Umuntu onsundu wayencindezekile okwamagama, impilo yakhe yayisemeveni ngempela. Akukho ngitsho lokukodwa okwakumkhulula loba okwakumnika ithuba lokukhululeka.
Sihlangana labalingiswa laba abamqoka sebebuzana labo bodwa besuselana umhlolo ngalokho ababezithole sebephakathi kwakho, bonke basebewise amehlo bezibona nje ukuthi basebephakathi kwegodi lokufa.
Babengadutshulwa nje loba nini kungabi ndaba zalutho.
Kakho owayengazikhathaza ngelithi babuze bazithole nje sebephakathi kwalindawo ngesikhathi esinjalo kwakutheni.
USethekele wayesebona kungcono ukuthi bavele nje bayezilahla ezandleni zamapholisa njengoba babevele sebekhangelane lomlomo wesilwane.
USimilo njengendoda elesibindi wabuya wabaqinisa njalo ukuthi babophe izifuba zabo kuthi lapho kusiba lobunzima benelise ukuthi bavale izifuba bangazivumeli zimane zivuze nje.
Isibindi sakhe sasimangalisa okwamagama, kwakungazwisiseki ukuthi kanti kuyini okungaka okwakumqinisa aze abelesibindi esingaka ngakho konke nje okwakusenzakala.
Isibindi yiso-ke okwakumele sibakhulule emjibileni abasebengene kuwo. Kwasekulindwe nje ukuthi kutshaye ihola letshumi ukuze bachaphe kulindawo bengaba phephileyo.
USethekele wayesekhalela nje ingane yakhe loMzila eyayizasala isiyintandane lapho bonke sebedutshulwe bafa.
Eceleni ngapha uMzilakawulandelwa wayesezibuze waziphinda phinda ngobudlelwano obabukhona phakathi kukaSethekele inkosikazi yakhe kanye loSimilo lo, wayeseze wafika lasekucabangeleni ukuthi mhlawumbe indoda le yayingunyanewabo kwakusazi bani njengoba nje wayebona izimisele okwamagama ukubancedisa ingatshengiseli lokudela kumbe ukwesaba lokhu bedlula phakathi kwezihotsha zokufa.
Elokhu ephakathi komcabango wakhe ojulileyo wezwa nje uSimilo esesithi ihola letshumi laselitshayile okwakuchaza ukuthi kwasekumele bahambe, isikhathi sasesibakhulula ukuthi baqhubekele phambili ngohambo lwabo.
