uMthunywa
SIYAQHUBEKA ngohambo lwethu lamaqhawe amathathu asedlule phakathi kwezivunguvungu ezinengi kodwa-ke lokhu beqhubeka ngohambo olunzima. Sebesesibhedlela lapho uMzila ayesezathola khona usizo.
Wayelokhu ephatheke kubi ngokuthi uSethekele wayelokhu engakezwa lutho ngaye.
Wathi nje elokhu ephakathi kokudla amathambo engqondo kwangena uSimilo, kulapho ezwa khona iphika lisehla wabuza ukuthi uSethekele wayenjani lokuthi wayevele engaphi.
Waziswa-ke ukuthi uSethekele wayesesibhedlela sabesifazana lapho ayethola khona uncedo, wayesethungiwe lenxeba ayelalo sekulethemba lokusila.
Wayefisa sibili ukuthi ayebona omunye wakhe loba nje wayesenqatshelwa ngumthetho wokuthi laye wayevele eyisigulane.
Yisikhathi lapho esibona khona indoda isehlisa inyembezi, lokhu kusichazela kabanzi ngesinye isimilo sakhe, wayelothando wayemthanda uSethekele ecabanga njalo lokuthi kambe kwasekungaba yikwehlukana okwesibili njalo ngendlela nje ezibuhlungu zodwa, yikho lokho okwamenza wehluleka ukuzibamba njengendoda wehlisa inyembezi.
UMzila wayelokhu ezidla izibindi edliwa yimibuzo njengoba nje wayelokhu engakazi ukuthi kanti vele uSimilo lo wayevele engubani njengoba wayelokhu ehamba laye nje indlela yonke.
Wabona kungcono ukuthi aqunge isibindi ambuze ukuthi wayevele engubani wayesemncede kakhulu, uSimilo laye wazichaza.
USimilo wayengumnewabo kaSethekele ozalwa ngunina omncane. Ngakho-ke kwakufanele sibili ukuthi ancede udadewabo phakathi kobunzima obungaka ayebhekene labo.
USimilo laye waveza udaba lwakhe olubuhlungu lokuthi laye wabanjwa ngamandla ukutshiya umsebenzi wakhe sekumele achaphe layo ayefundela ezombangazwe.
Abantu babephakathi kobunzima, amalungelo abo ayevele ehlakazwa mahlayana nje abantu bedilikelwa yimizi belahlekelwa yizihlobo zabo, kwakungekho nje lokukodwa okwakuyinjabulo ebantwini.
USimilo-ke yena wayedonselwe kubutho ngokubanjwa ngamandla. Kwathi-ke lapho sebebuthiwe kwaficakala ukuthi yena-ke wayelekhanda elivuthayo izinto ezinengi wayezithathela phezulu engagqize qhakala.
