uMthunywa
lwalotshwa ngu B D Ndlovu
SIQHUBEKA ngohambo lwethu lapho esatshiya khona abalingiswa bethu abathathu sebehlangane labanye babo.
Lapha-ke kwasekulentutshana yethemba ukuthi mhlawumbe loMzila lo wayesengathola ukwelatshwa phezu kokulimala okwamehlelayo.
USethekele-ke laye wayekudinga ukwelatshwa ngemva kokutshaywa luhlamvu lombhobho. Uhambo lwakhona lwaluhlaba njalo lulameva okwamagama.
Siyananzelela ukuthi amaqhawe la awazange alahle phansi induku, bagomela besiya phambili okusivezela kakhulu ukuzinikela kwabo kanye lokuzinikela enhlosweni yenkululeko.
Siqala isahluko setshumi lasitshiya galo lunye. Lapha-ke uMzila ulandisa ngokufika kwakhe enkambeni yeDukwe lapha-ke basebeselizweni leBotswana.
Wayevele elele efile nya okokuthi lomango lo wayevele engawuzwa, kambe umuntu wayesevele esentunyiswe ngamanxeba ayemgwaza umzimba wonke kodwa kungekho ngitsho indlela yokuwathoba lokuwanqunda nje kodwa lokhu.
Waphaphama esezibona nje esethwelwe yinqola yezigulane, lapha-ke kwasekusobala ukuthi usizo lwaselusemakhaleni.
Wemukelwa ngabongikazi ababelomusa sibili laye wazizwa eqina kambe esebona ukuthi lapha wayesezakwelatshwa laye aphile.
Esibhedlela lapha izigulane zazinakekelwa ngenhliziyo ezimhlophe nke. Baphiwa lokudla badla izisu zaba ngezabo nanane, wathola lamaphilisi okuthoba inhlungu.
Emva kokudla kwafika udokotela omhlophe onguye owahlolahlola unyawo lwakhe ngemitshina emikhulu babuye njalo balugcoba unyawo lwakhe ngomuthi othile balubopha, wabuya njalo waphiwa lamaphilisi okwehlisa inhlungu.
UMzila-ke yena wayelokhu engahlalisekanga ngoSethekele ezibuza ngelithi pho lapho ayekhona kwakuqhubekani njengoba wayelokhu engezwanga lutho ngaye.
Kwakukhona nje esiba lomcabango ocacileyo ngayekubone kusenzakala kuSethekele ngesikhathi etshaywa luhlamvu, wayengahlanganisi kuhle imicabango ngenxa yobuhlungu ayephakathi kwabo, wayesekhathazekile ngelithi uSethekele wayengasoze aphile ngendlela ayembone egomela ngayo.
Lokhu kwamkhathaza okwamagama wazibona nje ubuntandane njalo egcekeni.
