uMthunywa
lwalotshwa ngu B D Ndlovu
SISAQHUBEKA ngodaba lwethu lapha esasesifike khona enkabeni yendaba silindele ukuzwa ngokufa kumbe ukuphila kwabathathu laba esazi kamhlophe ukuthi kwakukhona nje okwakutshaya amanzi ngohambo lwabo njalo sinanzelela izibindi ababezimisele ngazo.
Siyafunda kabanzi ukuthi kuqakathekile ukuthi umuntu kumele azimisele kangakanani ukuze ulutho afisa ukulufeza luphumelele.
Sibona uSimilo esengokhulumisana lamasotsha la okwakusobala ukuthi kwakulo kwazana thize lapha phakathi kwalaba bantu okungahle kusiphe mhlawumbe impendulo zokuthi isibindi esingaka wayesithatha ngaphi sokufohloza endleleni yamasotsha loMzila owayezingelwa ngamehlo abomvu gebhu.
USimilo nguye-ke owakhuluma lamasotsha, kwaba nguye olandisa indaba yabazawakhe laba ababesemoteni.
Babengabantu ababehlulukelwe ngemva kokulahlekelwa ngabantwana ngendlela ebuhlungu.
Lokhu kugcizeleleka ukuthi ngesikhathi sempi le kwakungalula ukuthemba umuntu ngalokho ayebonakala eyikho khona, kwakuqakathekile njalo kubalulekile okwamagama ukuthi umuntu acwayisiswe ukuze iqiniso libonakale libe sobala.
USethekele wathi nje ebona uSimilo exoxisana lamasotsha la kusiba sobala nje ukuthi bayazana, wasiyekela isivalo semota njengomuntu owayeselungele ukuphuma, wasivala wabuya njalo wabunisa ubuso ekhumbula ukuba ngumuntu ohlulukelweyo, wagobisa ikhanda ngobuso obubunileyo.
UMzila laye wenza ngokufanayo. Baxoxisana laba abazanayo amasotsha esebuzisisa ngokuthi ngabe kambe laye wayesezimisele ukuyachapha labanengi, njengoba abanengi babelubhekise kweleBotswana lapho ababesiyaqeqetshela khona ezokulwisana labebutho elalitshukumisa impi le eyayitshisa.
USimilo-ke wabikela amasotsha la ukuthi babehamba ngemfa labo babonakala sebesembatha usizi besizwa ngelemfa loba nje kuyibo njalo ababekhwaza ukuchitha amathumbu abantu phansi.
Amasotsha la asondela emoteni ezokhulumisa labo ababephakathi kosizi. Mhlawumbe labo babe labo ubuntu, besenziwa ngumumo njalo kudingeka bahambelane lomumo owawuqhubeka ngaleso sikhathi.
