uMthunywa
Ophezulu Stinta
SIQHUBEKA ngokukhangela imihlobo yezaga, ezabunjwa, zadabuka ngemihlobo etshiyeneyo ngokufanayo sinanzelela njalo ukuthi zisibukisa ngokutshiyana kwempilo futhi zikhomba imvelaphi yazo.
Kesikhangele imihlobo yezaga ethathelwa ebantwini, okubalulekileyo ngezaga akukhathalekile ukuthi kungaba yizaga ezikhomba izihlahla, inyamazana ekucineni kwakho konke zikhomba abantu, indlela yokuphila kwabo, ziyindlela yokukhuluma kwabantu.
Kesikhangele izibonelo ezitshiyeneyo ngezaga ezikhomba abantu:
Abake babonana bayophinda babonane futhi, lesi saga sadabuka lapho kunanzelelwe ubuhlungu bokwehlukana kwezihlobo, ikakhulu ezihlala kude lakude, kungaziwa lokuthi zizaphinda zibonane futhi yini.
Ngokunanzelela empilweni ukuthi izihlobo, zidibana ngemva kwesikhathi eside lakhona behlanganiswa kungaba lidili kumbe imfa, okwakusobala ukuthi kwakungaziwa ukuthi babezabuya babonane nini futhi, okuyinto eyayisenza baze bakhale lezinyembezi nxa sebesehlukana bethintwa nje yikuthi akwaziwa ukuthi ukubonana kwabo okulandelayo kuyabe kunini njalo sekutheni.
Isage lesi ke singasetshenziswa ngokufanayo lesaga esithi, sizaze sihlangane ekhalweni lwempungutshe. Kuchaza ukuthi lelolanga lilanga elikhulu, kuzajabulwa, kube lomtshitshimbo, laleyo ndawo abazadibana kuyo ayisoze nje imile lotshani obuluhluza.
Isaga lesi singasetshenziswa njalo phakathi kwabantu abaxabanayo, sebesongelana, ukuthi likhona ilanga eliyisithutha lapho abazahlangana, baxazulule udaba olubaxabanisayo.
