uMthunywa
SISAQHUBEKA njalo, ngomdlalo wethu wokuphicana. Kesikhangele ukuqakatheka komdlalo, empilweni zabasakhulayo kanye nje labantu abadala jikelele.
Umdlalo lo ekadeni ubuqukethe insika yempilo yabantu abansundu. Sinanzelela kakhulu ukuthi bezingekho izikolo zokufunda ulwazi oluthile njengalokhu esikubona kulezi nsuku kusakhiwa izikolo ezinengi njalo kuqakathekiswa imfundo.
Abantwana bekadeni bebefunda kakhulu emdlalweni lo wokuphicana, ukudla okwakha umzimba bebefunda ngakho kumidlalo le yokuphicana, indlela yokuphilisana labanye abantu, kanye lezizwe ezitshiyeneyo lakho bebekufunda ekuphicaneni lapha, ukuhlonipha kanye lokuziphatha phakathi kwabantu abadala, lendlela nje yokukhulumisa abadala, bexoxa kanye lokubaphendula, yizinto nje ababezifunda emdlalweni leyi.
Umdlalo lo wawubenza babe lesifiso sokufunda izinto ezinengi empilweni, imibuzo ababehlangana layo yayibenza badingisise kakhulu, kabanzi njalo lokhu kwakuqhelisa ulwazi lwabo ngendlela emangalisayo, okokuthi lapho sebebuyela kubontanga kumbe osowabo babefika sebezintshantshu ezimangalisayo.
Okwakuthe kwabaphica babengahlali phezu kwakho kodwa babedingisisa ngakho kwakuyindlela ekhaliphileyo yokubambisisa lokudingisisa ngolwazi oluthile. Ngakho sinanzelela imicijo emithathu eqakathekileyo ngomdlalo wokuphicana
(i) wawuyinsika yolwazi lwabasakhulayo (bekuyisikolo sabasakhulayo)
(ii) yayilola indlela yokucabanga kwabasakhulayo
(iii) umdlalo lo wawuqoqa abasakhulayo ndawonye.
