uMthunywa
Wangithembisa lami: Olwalotshwa ngu I N Mpofu
Ophezulu Stinta
Ngeviki edluleyo sinanzelele isehlakalo esingajayelekanga esehlela uNyembezi ngesikhathi ezivelela emsebenzini, uzibona esevinjezelwe nguMlahlwa kanye labangane bakhe, okuyinto nje engajayelekanga loba nje yena engazange ayitshaye indiva.
Kwabamnandi okwamagama lapha ekhaya ngaleyomini yokufika kukaNyembezi, isiqiniseko sothando lomdeni.
Ngakolunye uhlangothi sinanzelela njalo ububi besithembo lapho uMaNcube evukela okuSonile, icala lakho kuyikujabulela iziwiji ezazibuye lomnewabo. Kuphakama amagama aqatha angalingananga lengane, kodwa-ke kujinge kubesobala ukuthi ayeqondiswa ebazalini, yimpilo yakhona esithenjini le.
Labantwana bakhona bahle bakhule bengamahlongandlebe ngenxa yesimo abakhuliswa kuso.
Singena kusahluko sesine. UNyembezi baba lesikhathi esihle okwamagama bendawonye ngekhaya lomkakhe.
Kulapho abathola khona ubuqotho bothando lwangekhaya, bafunda ngothando olumnene oluzikileyo njalo.
Ngelanga langeSonto okwakulilanga lokucina likaNyembezi elapha ekhaya, ngezikhathi nje zantambama baqhubana besiya khangela emasimini, kwakuhle mpela kuhuga lokuthi umuntu azozihlalela ekhaya lapha kodwa-ke sinanzelela uNyembezi ekhalimela umcabango lo loba nje wayengafisa.
Phakathi kwengxoxo yabo, uNyembezi unakana ukuthi wayengazange alandisele umkakhe ngomhlolo awenzelwa ngoMlahlwa. Sinanzelela ukuthi uSolakele uchazwa njengomuntu osedonsa umnxeba womphefumulo, emva kokuzwa loludaba, akazange-ke athole ithuba lokuphendula, njengoba kwasuka kwangena inkomo emasimini.
Sibona nje esenza isicelo esibuhlungu kumkakhe ekhala ngokuthi akatshiye umsebenzi bazogcinana ngekhaya kumbe ahambe laye emsebenzini.
